AXCP sədrinin müavinin statusu sosial şəbəkədə ironik müzakirələrə səbəb olub.

Nurəddin Məmmədlinin facebook sosial şəbəkəsində yazdığı bir status böyük səs-küyə səbəb olub.

N.Məmmədlinin "Ukrayna hakimiyyəti vaxtında Əli Kərimlinin məsləhətlərinə qulaq assaydı, ən azı parçalanmanın yarısından qayıdardı" fikrini istifadəçilər şişirdilmiş hesab edib və ironik yanaşmalarla ələ salmağa başlayıblar. 

İronik yanaşmalar arasında ən maraqlısı Ukraynanın baş naziri Taraz Şevçenko adından Əli Kərimliyə yazılan şeirdir. Bu şeiri hazırda Hollandiyada yaşayan Müsavat Partiyasının fəxri üzvü İsa Yusibov öz facebook səhifəsində paylaşıb. Həmin şeiri sizə təqdim edirik:

Ey Oğuz elinin igid övladı

Sənsən Ukraynanın qolu-qanadı

Gəl bitir bu zülmü, bu istibdadı

Maydanda qalmışıq soyuqda, qəmli

Bizə məsləhət ver, Əli Kərimli

Bir xəbər verdilər bizə uzaqdan

Dedilər Bakıdan qalxacaq o dan

İsmini hayqırır hər gecə Maydan

Xaxol qızlarının gözləri nəmli

Bizə məsləhət ver Əli Kərimli 

Səndədir iradə, səndə qətiyyət

Maydana gəlməyə eyləsən niyyət

Hamımız cəddinə edərik biət

Ey zatı-möhtərəm, mübah qədəmli

Bizə məsləhət ver, Əli Kərimli