Əbülfət MƏDƏTOĞLU: YOXDUR
Bu günlər daş- daşı yeyir,
Dəyirmanın dəni yoxdur.
Bozarmış üst-başı deyir -
Ürəyin bədəni yoxdur...
Baxıb ellərin köçünə,
Sığındım dərdin küncünə...
Söz xətrinə, zor gücünə -
Cüləni var, şəni yoxdur!
Bəy atının, bəy itinin
Qiyməti var hər tükünün.
Mənim isə qəm yükümün -
Ortağı, nə təni yoxdur.
Atlanmadım, atdan düşəm,
Mən bu ömrə, günə tuşam.
Dərddən çəkilibdi köşəm -
Dərdin ki, Vətəni yoxdur.
1996.