İrandan gələn namə və Nura Surinin “gerçəkləri”...
İllər əvvəl İran İslam Respublikasının vətəndaşı Suri Əlirza Məhəmməd oğlu (Tehran şəhəri, Vəliəsr prospekti, ev 8) "Olaylar” İnformasiya Agentliyinə məktubla müraciət etmişdi əvvəlcə bu məktubu oxucularımızın nəzərinə çatdıraq:
"Hörmətli redaksiya!
Mən1973-cü ilin may
ayında Amerika Birləşmiş Ştatlarında anadan olmuş, burada orta və
ali təhsil almış və bundan sonra İrana köçərək orada yaşamağa başlamışam.
Bir müddət Tehranda dövlət qulluğunda kiçik bir
vəzifədə işlədikdən sonra 1995-ci ilin axırlarında Birləşmiş Ərəb Əmirliklərinə
- Dubaya üz tutdum, burada bir şirkət təsis edərək bizneslə məşğul olmağa
başladım. Birinci il biznes fəaliyyətimi qismən uğurlu hesab etmək olardı. Üstəlik
həmin vaxt mən vərəsəlik hüququ əsasında 250.000 dollar məbləğində böyük bir sərvətə
də sahib oldum. Lakin Dubayda Azərbaycandan olan Kazımova Aynurə Qəzənfər qızı ilə
tanışlığım bütün həyatımı alt-üst etdi. Ülvi bir sevgi həsrətli gənc olduğumdan
bu xanımın məkrli hiylələrindən çox gec xəbər tutdum. Həmin vaxt mən artıq
bütün pullarımı Aynurə üçün xərcləmişdim. Bakının mərkəzində 3 mənzil almış və
Aynurənin şıltaqlıqlarını ödəmişdim. Bu səbəbdən şirkətim böyük ziyanlara məruz
qaldı. Aynurə isə rəsmi qaydada evlənməmizdən artıq 2 ay sonra Azərbaycan
dilini bilməməyimdən və səmimiyyətimdən sui-istifadə edərək birinci nikahından
olan uşağının doğma atasından xəbərsiz mənim övladlığıma verilməsinə nail oldu.
2000-ci ilin martında oğlumuz doğulandan sonra isə pulumun tükənməsi Aynurənin əsil
iç üzünü tədricən göstərməyə başladı. Bir müddət sonra başa düşdüm ki, bu
xanımla ailə qurmaqla dəhşətli dərəcədə yanlış bir addım atmışam. Ona görə də
2001-ci ildə boşanmağa görə məhkəməyə ərizə verdim. Aynurə isə məndən 2 uşağa
görə nə az, nə də çox təxminən 650.000 dollar aliment tələb etdi. Uzun müddət
davam edən məhkəmə prosesləri bununla sonuclandı ki, heç bir gəlirim olmadığına
və valideynlərimin himayəsində yaşadığıma baxmayaraq, hər bir uşağa görə ayda
150 dollar, cəmi 300 dollar aliment verməliyəm. Daha bir məhkəmə qərarı ilə də
Aynurənin adına aldığım mənzillərin ən ucuz bir mənzili mənə verildi, qalan 2
bahalı mənzil isə Aynurədə qaldı. Lakin çox çəkmədi ki, məhkəmələrdə Aynurəyə
havadarlıq edən şəxslərin köməyi ilə həmin mənzil də aliment hesabına məndən
alınaraq Aynurəyə verildi.
2009-cu ildə mənə məlum oldu ki, mənim
övladlığıma verilmiş uşağın doğma atası məhkəmə yolu ilə övladlığa verilməni
etibarsız hesab etdirərək uşağa olan hüquqlarını bərpa etdirmişdir. Ona görə də
mən alimentin miqdarının azaldılması üçün məhkəməyə müraciət etdim, lakin 2 ilə
yaxın davam edən proseslər onunla nəticələndi ki, mən 2001-ci ildən başlayaraq
bir uşağa görə ayda 400 dollar aliment ödəməliyəm. Təsəvvürünüzə gətirirsiniz?
2 uşağa görə 300 dollar ödəyirdim, indi isə 1 uşağa görə 400 dollar!!! Belə
ziddiyyətli qərarların hansı məntiq və hansı mülahizələrə görə qəbul
olunmasının səbəbini bilmirəm. Son qərarın ədalətsiz olmasına isə heç bir şübhəm
yoxdur.
Məhkəmələr faktiki olaraq məni əsassız olaraq
30.000 dollar cərimələyiblər.
Ona görə də mən Azərbaycan Respublikasının
Prezidenti Zat-Aliləri cənab İlham Əliyevə və Azərbaycan Respublikası Konstitusiya
Məhkəməsinin sədri cənab Fərhad Abdullayevə rəsmi qaydada müraciət etmişəm ki,
bu işdə ədalətsiz qərarların dəyişdirilməsi üçün köməklik göstərsinlər.
Mən Aynurə xanıma qarşı yeni tələblərlə məhkəmələrə
ərizələrlə müraciət etmişəm. Bu tələblərimdən biri ondan ibarətdir ki, mən öz
övladımla mütəmadi olaraq ünsiyyətdə olmaq istəyirəm. Bu barədə müvafiq məhkəmə
qərarı olmasına baxmayaraq son illər Aynurə xanım süni maneələr yaradaraq mənə
uşağımla görüşməyə imkan vermir.
Digər tələbim isə şərəf və ləyaqətimin müdafiəsi
ilə bağlıdır.
Azərbaycan Respublikası Ailə Məcəlləsinin tələbinə
görə nikah pozulduqda ər (arvad) ümumi soyadlarını saxlamaq və ya nikahdan əvvəlki
soyadını bərpa etmək hüququna malikdir.
Mövcud qanunvericiliyin digər bir tələbinə görə
isə dövlət və ictimai təhlükəsizliyin, ictimai qaydanın, cəmiyyətin
sağlamlığının və mənəviyyatının qorunması, digər şəxslərin hüquq və
azadlıqlarının, şərəfinin və təmiz adının müdafiəsi üçün zəruri olduqda mülki
hüquqlar qanuna uyğun olaraq məhdudlaşdırıla bilər.
Fikrimi yəqin ki, anladınız. Bəli, mən Aynurənin
mənim soyadımı – Suri soyadını daşımağına qəti etiraz edirəm!
Yazılmamış qanunlara əsasən bütün dünyada qəbul
olunub ki, nikah pozulduqda ər-arvad bir qayda olaraq nikahdan əvvəlki
soyadlarını bərpa edirlər. Bununla da həmin şəxslər özlərinə qarşı olan hörmət
və ehtiramı nümayiş etdirirlər. Buna minlərlə misal göstərmək olar. Amma nədənsə
Aynurə xanım həmişə keçmiş ərlərinin soyadını daşımağa üstünlük verib. Ona
doğma atasının soyadını daşımağa nə mane olur?
Mənim hər bir kəsə və hər bir soyadına böyük
hörmətim var. Soyadıma hər hansı bir üstünlük vermək fikrim də yoxdur.
Aynurəni tanıdığım vaxtdan indiyə qədər onun
bütün hərəkətlərinə, o cümlədən ləyaqətə xələl gətirə bilən hərəkətlərinə dözmüşəm.
İndi isə bu xanımın son hərəkətləri çox həssas bir məqama toxunduğundan dözmək
fikrim yoxdur. Məsələ burasındadır ki, son illər Aynurə internet saytlarında
Nura Suri adı altında yarıçılpaq fotoşəkillərini yerləşdirir, seksi ulduz
müsabiqələrinə qatılır, üstəlik fasebookdakı profilində mənim razılığım olmadan
fotoşəkillərimi nümayiş etdirir. Ola bilsin ki, Aynurə xanım evində böyüyən və
gələcəyin kişisi olacaq 3 oğlan uşağından, ata-anasından, müqəddəs ana adından
utanmır. Amma onun bu hərəkətləri mənim ailəmi, İslamın namuslu və qeyrətli bəndələri
olan valideynlərimi tanıyan hər bir kəsin qarşısında şərəf və ləyaqətimə
toxunur.
Aynurənin evində bu gün damarlarında mənim
qanımın axdığı bir oğlan böyüyür. Mən əminəm ki, o oğlan yetkinlik yaşına
çatandan, özünü və məni bir kişi kimi tanıyandan sonra anasının Suri soyadını
daşımasına qəti etiraz edəcək.
Ona görə də ailəmə, övladıma və valideynlərimə
hörmət əlaməti olaraq, istəyirəm ki, Aynurə mənim soyadımı yox, onu boya-başa
çatdıran, ona bu tərbiyəni verən atasının soyadını daşısın. Hesab edirəm ki, mənim
yerimdə olan hər bir kişi belə iddia ilə çıxış edərdi.
Suri Əlirza Məhəmməd oğlu”
İndi isə danışır Nura Suri...
"Bir
çox insanlar elə zənn edirlər ki, həyat yoldaşım ərəb olub. Bu, əsla belə
deyil. Həyat yoldaşım iranlı olub. Həm anam, həm də atam yarı iranlıdır.
Haqqımda gəzən şayiələrə inanmayın. Mənim barədə doğru məlumatı almaq istəsəniz,
sosial şəbəkə səhifələrimə baxın. Orda keçmişim, nənəm, babam, anam, atam,
uşaqlığım, həyat yoldaşlarımın şəkilləri var (gülür)”.
Adalet.az xəbər verir ki, bu
sözləri məşhur müğənni Nura Suri "Xəzər” televiziyasında yayımlanan "X Maqazin”
proqramına verdiyi müsahibəsində deyib.
Sənətçi bu yaxınlarda nənə olacağı barədə gəzən xəbərlərə də aydınlıq gətirib:
"Verilişlərin
birində zarafat elədim. Bu söhbəti insanlar ciddi qəbul etdilər. Oğullarımın
sevdikləri qızlar var. Bu, normaldır. Hər gəncin sevgilisi olmalıdır. Toy etsəm,
bunu gizli şəkildə, qapalı edən deyiləm”.
Qeyd edək ki, müğənni N.Surinin Xosrov, Möhsen və David adlı üç övladı var.
Yeri gəlmişkən, Suri Əlirza Məhəmməd oğlunun məktubla
bildirdiyi məlumatların heç birini Nura Surinin dilindən
eşitməmişik.
Əntiqə Rəşid