Vətəndaşlara Xidmət və Sosial İnnovasiyalar üzrə Dövlət Agentliyinin Elektron Hökumətin İnkişafı Mərkəzinin təşkilatçılığı və "Paşa Holding”in sponsorluğu ilə həyata keçirilən "Rəqəmsal Jurnalistikaya doğru” Proqramının I hissəsi yekunlaşıb. "ZOOM” platforması üzərindən 4 gün ərzində həyata keçirilən vebinar təlimlərdə iştirakçılar ölkənin ən peşəkar kadrları tərəfindən məlumatlandırılıb və suallarına ətraflı şəkildə cavab tapıblar.

"Rəqəmsal Jurnalistikaya doğru” Proqramının əsas məqsədi media nümayəndələrinin jurnalistika sahəsində baş verən yeniliklər və trendlərlə tanış edilməsi, elektron xidmətlər və rəqəmsal həllər haqqında məlumatlandırılması və bu xidmətlərin vətəndaşlar arasında düzgün təbliğinin təmin edilməsidir.

"Rəqəmsal Jurnalistikaya doğru” proqramı iki mərhələdən ibarətdir. Birinci mərhələdə 140-a yaxın müraciətdən müvafiq kriteriyalar üzrə seçilən 40 iştirakçıya müxtəlif mövzularda vebinar təlimlər keçirilib. Təlimlər 4 gün-17,18,19, 20 iyun tarixlərində baş tutub.

20 iyundan etibarən layihənin 1-ci mərhələsinə yekun vurulub və 2-ci mərhələsinə start verilib. Bu mərhələdə "Rəqəmsal Jurnalistikaya doğru” Proqramının vebinar təlimlərində iştirak edən şəxslər münsiflər heyəti tərəfindən verilən mövzular əsasında araşdırma işi apararaq yazı müsabiqəsində iştirak edəcəklər. Qalib iştirakçılar üçün 2200 manatlıq mükafat fondu nəzərdə tutulub. Müsabiqəyə təqdim ediləcək məqalələrin son müraciət tarixi 24.06.2020-ci il saat 00:00-dır.

#YenilikləriKəşfEt #RəqəmsalJurnalistikayaDoğru #eGovAzerbaijan