Əbülfət MƏDƏTOĞLU: RUHUMUN ŞEİRİ...
Doğmalıq axtarıram
Ağacda, daşda, qumda...
Göyərtməkçün ürəkdə -
Sənin etdiyin şumda!..
Ağlım araşdırmaçı
Hisslər sadiq kahindi...
Xəyalım varlığına -
Keşik çəkən şahindi...
Külək qırmış budaqdı
Bükülən barmaqlarım...
Didəm - lilli bulaqdı -
Tökülən yarpaqlarım...
Köklənmişəm xatirə-
Ritminin ahənginə...
Yaddaşım tamarzıdı -
Bir bakirə zənginə...
Axtardığım doğmalıq -
Yuxudu - çin çıxmayan...
Sayma bunu lovğalıq -
İçindən cin çıxmayan!..