Əbülfət MƏDƏTOĞLU: SUYA DÜŞƏN ŞƏKİL
Bir dan yeri var, bir qürub
Xəyal körpüsü arada...
Ürəyim körpüdə durub -
Ləpirin düşüb ora da!..
Nazilən ümid kəndiri
Nəm çəkir kiprik ucundan...
Ruhum sallanan təndiri -
O qız qalayır saçıynan!..
Əllərim isinmir ...amma
Dilimin dilçəyi yanır...
Saçların qorun ovcuma -
Gözlərin ulduz tək sayır...
Dişimlə sıxıb nəfəsi,
Danı qüruba çəkirəm...
Xəyal körpüsü üstündən -
Mən suya düşən şəkiləm!..