Əbülfət MƏDƏTOĞLU: YAŞAYIM
Doğranmış qol-budaq ilə -
Demədin, necə yaşayım...
Bu ömrü qurbanlıq edim -
Verim ya heçə, yaşayım?!
İçimdə hakimdi qəhər
Ən ahıl sakindi - qəhər...
Yoxsa hamı tək - birtəhər -
Qoşulub köçə yaşayım?!
Ahımı düyüm sap kimi
Bir köhnə söhbət - gap kimi ...
Axtarır gözüm tap, kimi -
Gündüz, həm gecə yaşayım...
Əlimi ovcunda görüm
Canımı ovçumda görüm...
Sən məni ovsunla , görüm -
Ölüm heç - heçə ... yaşayım...