Əbülfət MƏDƏTOĞLU: TANRIMA SƏHƏR DUASI
İçimdə bir qəriblik
Bir susqun ümid sönür...
İlahi,ətəyindən -
Əllərim bomboş dönür...
Yalvarmağım havada
Dualarım diz altda...
Bu necə Tanrılıqdı -
Əl havada - biz, altda?!
Anlamıram heç nəyi,
Heç kim də məni duymur...
Tək Sənə ibadətdən -
Hələ ki, ruhum doymur...
Xilas da, son da Səndə
Bəndənə zaman ayır...
Bilirəm, əl açan çox -
Hamı da növbə sayır...
İlahi, öz lütfündən
Ümidimə bir qor at!
Ya ona sevməg öyrət,
Ya məni ilğıma qat!...