Əbülfət MƏDƏTOĞLU: SARALAN GÖZ YAŞLARIM
Daha
söz oynatmıram...
Özüm oynayıram
sözün içində-
başı aşağı...
Heç nə yaratmıram -
sadəcə,
atıram
Sözü göyə,
daşı aşağı...
Bir də istəyirəm
seçəm -
kipriklərimin-
Qurusun üstə,
yaşın aşağı!..
Başqa
ağlımdan keçən
heç nə yox -
Sizsiz!
Ay məni atıb köçən,
Adam uşağı...
Eh...nə isə...
Onsuzda ,
səs verməyəcək kimsə!
Odur ki,
bu da olsun
saralmış
göz yaşımın
başağı!..