Yalan informasiya yaymağa görə məsuliyyətin ağırlaşdırılması təklif edilir.

Adalet.az-ın məlumatına görə, bu təklifi Milli Məclisin Regional məsələlər komitəsinin sədri Siyavuş Novruzov parlamentin bu gün keçirilən iclasında deyib.

O bildirib ki, radikal müxalifət koronavirusdan istifadə edərək yalan məlumatlar yaymaqla cəmiyyəti çaşdırmağa çalışır:

"Hesab edirəm ki, buna qarşı tədbirlər görülməlidir. İnformasiya dəqiq deyilsə, xalqı çaşdırmağa xidmət edirsə, dövlət əleyhinə yönəlirsə, qərəzlidirsə, bununla bağlı ciddi addımlar atılmalıdır”.

S.Novruzov Cəmil Həsənlinin sosial şəbəkədə yazdığı statusa da toxunub:

"Özünü alim adlandıran Cəmil Həsənli xaricdə oturub Milli Təhlükəsizlik Nazirliyinin 1994-cü ildən sonrakı arxivlərinin açılmasını istəyir. Bundan əvvəl isə 1992-1993-cü ildəki arxivlərin açılmasını istəyirdi. Ancaq indi biliblər ki, 1992-1993-cü illərin arxivləri açılsa oradan öz adları çıxacaq. Onlara bu məlumatı xaricdən veriblər ki, sizin adınız orada var. Buradan bir daha aydın olur ki, onlar xarici qüvvələrə işləyirlər”.