Əbülfət MƏDƏTOĞLU: İLK SƏNİN ADIN OLDU
Baxcamdakı güllərin
Ləçəklərin də saydım...
Çiçək kimi qızların
Göyçəklərində saydım -
İlk sənin adın oldu...
Qarşılaşdığım neçə
Baxışları da andım...
Qəlbimdə - tam gizlicə
İçdiyim, özəl andım -
İlk sənin adın oldu...
Duyğuların telini
Oxşayan meh - nəfəs də...
Buraxmayan əlini
Dəli istək, həvəs də -
İlk sənin adın oldu...
Qurduğum xəyallar da
yozduğum yuxular da...
Və hər cürə hallarda
Ən həssas duyğular da -
İlk sənin adın oldu!..