17 aprel 1998-ci ildə Tayland və Kambocanı ayıran sərhədin kimsənin
bilmədiyi bir yerində tarixin gördüyü ən qaniçən pxisopatlarından biri Pol
Potun meyidi yaxın adamlarının qatıldığı yerli bir mərasimlə yandırılırdı. Bir utopiyanın izinə düşüb vətəndaşlarını qan
vannasına salan adamın xəyalları da özüylə birgə kül olub küləklə birlikdə
Taylanda doğru sovrulurdu. Maraqlı olan budur ki, əti və sümükləri oda təslim
edilən adam öz döyüşçüləri tərəfindən bir müddət idi ki, öz memarı olduğu
inqilaba xəyanət etməsi adıyla əsarətdə saxlanılırdı.
Həyatının son günlərinə yaxın Pol Potu da ölüm qorxusu bürümüşdü. Aldığı hər nəfəsinin
sonuncu ola biləcəyini düşünürdü. Belə günlərdə mətbuat önünə çıxaraq qızından
bəhs edərkən digər tərəfdən də öz səhhətindən narahat olduğunu dilə gətirmişdi.
Etdiyi əməllərə görə cavabdehlik daşıyıb-daşımadığı sual veriləndə isə " mən
mübarizə aparmaq üçün gəldim, insanları öldürmək üçün deyil” deyib əlavə
etmişdi: "Bu halıma baxın. Vəhşi bir insana bənzər halım varmı?”
Doğru idi. Heç də vəhşilərə bənzəmirdi. Bununla birlikdə 1975-79-cu illərdə
Demokratik Kamboca kimi bilinən rejimə rəhbərlik edən Pol Pot Maoist Çinindən
alınmış olan utopik siyasəti nəticəsində 2 milyon ətrafında insanı məhv
etmişdi. Bunların 200 mini " dövlət düşməni” və " içimizdəki xain” kimi
ittihamlarla damğalandıqdan sonra edam edimişdi. Ölənlərin sayı əhalinin sayı
nisbətiylə müqayisə olunarsa Kamboca inqilabının inqilablar əsrinin ən qanlısı
olduğunu deyə bilərik.
Fransaya burjuaziyaçı kimi getdi,
bujuaziya düşməni kimi döndü
Ölkəsinin başına bir bəla kimi çökəcək Pol Pot Kambocanın Fransa mandatı olduğu
vaxtda varlı bir ailənin uşağı kimi doğulmuşdu. O vaxtlar Salos Sar kimi
tanınan Pol Pot fransız dil məktəblərində oxudu. Illər sonra bir sinif yoldaşı
onun haqqında " çox düşünür, az danışırdı " deyəcəkdi. 1949-cu ildə fransız
dilini bilməsi ona Paris qapılarını açdı. Siyasi əlaqələrindən istifadə edərək
aldığı kreditlə Fransada radio-elektrik təhsili almağa başladı. Lakin bu ölkədəki
vaxtının çoxunu onun deyimiylə " uzaqgörən kitablar” oxumağa sərf etdi. Müstəmləkəçilik
əleyhinə çıxışıyla onu cəzb edən Fransa Kommunist Partiyasına qatılmaqda bir an
belə tərəddüd etmədi. Bir müddət sonra məktəblə yaxından, uzaqdan əlaqəsi
qalmadığına görə təhsil krediti kəsildi. O, evə qayıtmaq məcburiyyətində qaldı.
Kamboca müstəqil olmasına oldu, amma...
Kambocanın 1953-cü ildə Fransadan müstəqilliyini almasından sonra həm
ölkə, həm də Salos Sar üçün yeni bir dövr başlayırdı. Bir tərəfdən paytaxt
Pnompendə özəl bir məktəbdə müəllimlik edən Sar digər tərəfdən gizli bir
kommunist partiyasının özək üzvü olaraq qanundankənar toplantılara qatılmanın,
onların özünə xas rituallarının gizlicə yerinə yetirməsinin həyəcanını yaşayır,
fürsət düşdükcə hakimiyyətə gəlməyin xəyallarını qururdu. Kamboca Kommunist
Partiyasının başına gəldikdən sonra polis qorxusundan bir dəstə dostuyla
Vyetnam-Kamboca sərhədi yaxınlığındakı bir Vyetnam hərbi bazasına(Ofis 100)
sığındı. Iki il ərzində burada vyetnamlıların nəzarətində lüks həyat yaşadılar.
Salos Sarı Pol Pot eliyənsə Maonun Çini oldu. Çinli kommunistlər gələcək vədlərinə
inandıqları dostuna " Politika Potensialına” görə Pol Pot ləqəbini vermişdilər.
Maonun mədəni inqilabından və utopiyasından başı fırlanan Pol Pot çinli radikal
kommunistlərlə görüşlərinin ardından bambaşqa düşüncəylə ölkəsinə qayıtdı.
1960-cı illərdən etibarən Kamboca Kommunist Partiyasının silahlı qolu kimi
özünü göstərən Qırmızı Kxmerlərlə birgə ölkənin meşəlik bölgəsində öz qərərgahını
yaratdı. Hərəkətə keçəcəyi 1970-ci ilə kimi təbiət qoynunda burjuaziya mədəniyyətindən
uzaq, tərəfdarlarıyla birlikdə düşüncə hazırlığıyla vaxt keçirdi. Kapitalist
sistemə və gətirdiyi həyat tərzinə nifrətini aşıladı. Belə günlərdə Vyetnam
müharibəsinə görə qonşu ölkədə qiyamət qopur, Amerika vyetnamlı qırmızıları
bombalayır, Vyetnam meşələri amerikalılarla kommunist döyüşçülər arasındakı savaşa
görə yaşıldan qırmızıya dönürdü. Müstəqil görünməyə çalışan Kamboca isə əslində
mümkün olmayanı bacarmağa çalışırdı. Vyetnam müharibəsində kimsənin ayağını
tapdamadan bitərəf qalmaq çətin idi. Ölkəni Fransa müstəmləkəsi olmaqdan
qurtaran və eyni zamanda müstəmləkə dövründən sonranın ilk və əbədi rəhbəri
olan Şahzadə Norodom Sihanouk bu qarmaqarışıq dövrdə bölgədə güclü olanların, yəni
Çin və Şimali Koreyanın könlünü xoş eliyərək praqmatik bir yol tuturdu. Tək dərdi
Kambocanı müharibə xaricində saxlamaq olan şahzadə Maoçu siyasətin dəyərləndirilməyə
layiq olduğu bildirir və Cənubi Asiyada kommunizmin zəfərinin qaçılmazlığını
deyərək Çinə göz qırpırdı. Çin də bunun qarşılığında yüksək qiymətlə Kamboca
düyüsü alırdı. Şahzadə Sihaonouk eyni zamanda Kamboca üzərindən Şimali Vyetnam
hərbiçilərinə hərbi-sursat göndərilməsinə də göz yumurdu. Hər kəs məmnun idi.
Bununla birlikdə Çindəki mədəni inqilabın radikallığı ilə şahzadənin Çinlə
könül bağı qopacaq və o ölkəsində solu təzyiq altına alacaqdı. Onu devirməyə
çalışan və ölkəyə öz istədikləri kimi kommunizm gətirməyə çalışan kxmerlərə "
Qırmızı Kxmerlər” adını verən də Sihanouk olmuşdu. O, ikili siyasətiylə ölkəsində
nəzarəti itirəndə Vaşinqtondakılar düyməyə basdı. Sihanouk Amerikanın dəstəklədiyi
millətçilər tərəfindən devrildi. Paytaxtda bu hadisələr baş verərkən uzun müddətdir
meşədə gizlənərək zamanını gözləyən Pol Pot öz qabığını qırırdı.
Amerika bombalayır, Qırmızı Kxmerlər
böyüyür
Devrilməsindən sonra Sihanouk öz iqtidarına təhlükə gördüyü Qırmızı Kxmerlərin
Amerikanın dəstəyi ilə iqtidara gələn yeni hökümətə düşmən olduğunu açıqladı.
Özünə müttəfiq axtarırdı. Devrilmiş dövlət rəhbərinin bu açıqlamasından sonra
şimali vyetnamlılar Qırmızı Kxmerlərə kömək etməyə başladı. Onlara silah göndərib
təlim keçdilər. Bir müddət sonra Şimali Vyetnam birlikləri Kambocanı işğal edərək
amerikapərəst hökümətə qarşı döyüşməyə başladılar. Qırmızı Kxmerlər də onlara dəstək
verirdi. Bu vaxt ərzində Pol Pot birliyinin heyət sayını artırmaq və yeni
qatılanların ideoji təhsilini tamamlamaqla məşğul idi. Amerikalıların Vyetnamla
birlikdə Kamboca torpaqlarını da bombalaması kambocalıların Qırmızı kxmerlər tərəfinə
keçməsinə səbəb oldu. Bu bombardmanlarda 600 min kambocalı həyatını itirmişdi.
Amerikanın bu əməliylə Pol Pot bənzərsiz bir mədən kəşf etmişdi. Digər tərəfdən
yalnız keçmişi kəndli olanların və təhsilsizlərin Qırmızı Kxmerlər tərəfinə
keçməsinə izn verilirdi ki, bu da başdan ayağa axmaqlıq idi. Buna baxmayaraq
başda Pol Pot olmaqla təşkilatın rəhbərliyi Fransada təhsil görmüşdü və
intelektual təbəqə sayıla bilən imzalar idi. Zamanla Vyetnamlılar diqqətlərini
Amerikayla müharibəyə ayırdılar və Kambocada hakimiyyətə gəlmək istəyini
Qırmızı Kxmerlərə buraxdılar. Vyetnamlı kommunistlərin cəbhədən çəkilməsiylə
Pol Pot da onları dəftərindən sildi. Tərəflər arasında uzun müddətli soyuq
münasibət başlayacaqdı. Həmin ildə ölkədəki hökümətin və ordunun durumu pis idi
və Qırmızı Kxmerlər əsas güc olaraq qalmışdı.
Pol Potun liderliyi ilə Qırmızı Kxmerlərin paytaxt Pnompeni işğal etməsiylə vətəndaş
müharibəsi başa çatdı. " Demokratik Kamboca” adıyla yeni bir rejim quruldu. Pol
Pot baş nazir oldu. Müharibədən bezən şəhərin 2 milyonluq əhalisi kommunist
döyüşçüləri sevinc nümayişləri ilə qarşıladı. Müharibədən və kasıblıqdan
bezmişdilər, boynuna qırmızı şarf atan bu gənc, idealist döyüşçünün liderliyi
ilə yeni bir cəmiyyət inşa edəcəklərini düşünürdülər. Qısa zamanda yağışdan
çıxıb yağmura düşdüklərini anlayacaqdılar. Həm də necə bir yağmur...
Ölkə bir anda orta əsrlərə qayıtdı
Qırmızı kxmerlər 2 milyonluq paytaxt əhalisini "Amerikalılar bombalayacaq” bəhanəsi
ilə bir gündə boşaldıb düzənliyə yerləşdirdilər. O andan etibarən böyük bir
dram başladı. Kütlələr düyü tarlalarında işləməyə məcbur edildi. Pol Potun
düşüncəsində qurduğu "öz-özünə çatan tarla cəmiyyəti” utopiyasının zavallıları
olmuşdular. Kxmerlər ölkənin digər böyük şəhərlərini də boşaltdılar. Pulu,
bankları, qısası, modern iqtisadiyyata dair nə varsa hamsını” yeni quracağımız
cəmiyyətdə bunlara yer yoxdur” deyə aradan qaldırdılar. Məktəbləri, bazarları,
qəzetləri, hər dinə aid ibadətxanaları yerlə bir etdilər. Xüsusi mülkiyyəti məhv
etdilər. Xarici dünyayla əlaqəsi kəsilən ölkə insanoğlunun şahid olduğu ən
böyük məhv edilmə səfərbərliyinə beşiklik edirdi. Burjuaziya mədəniyyətini məhv
etməyə andlı olan kxmerlər pulu və təhsili olan hər kəsə düşmən idi. Bu
kateqoriyaya uyğun gələnlər qəddarcasına məhv edildi. Belə ki, eynək taxması və
xarici dil bilməsi insanların "burjuaziya”, "intelektual” , yəni cəmiyyət düşməni
olaraq tanınmasına səbəb olur və bu başına keçirilən salofan torbasıyla
boğulmasına yetərli idi. Bəli, Kxmerlər əlavə xərc olmasın deyə qurbanlarını mərmiylə
deyil, boğaraq ya da döyərək öldürürdülər.
1975:Year Zero(Sıfır ili)
Pol Potun manyak rejimi iqtidara gəldikdən sonra təqvimi də sıfırlamış və mədəniyyətin
sıfırdan başladığını elan etmişdi. Bu mədəniyyətə dair nə varsa, hamsının dibinə
kibrit suyu tökülməsi anlamına gəlirdi ki, elə də etdilər. Ölkənin orta əsrlər
dövrünə dönməsi: sadəcə qarnını doydurmaq üçün yaşayan bir cəmiyyətə, Pol Potun
beynindəki "ideal” cəmiyyətə dönmək üçün modern həyata aid nə vardısa hamısı məhv
edildi. Belə ki, eynək taxanlar, xarici dil bilənlər burjuaziyanın təmsilçisi
adıyla öldürüldü. Zatən Pol Pot bir az da hakimiyyətdə qalsaydı bütün xalqının
sayını sıfra endirəcəkdi. İki milyon insanı öldürərək ölkə əhalisinin üçdə
birini məhv etmişdi.
"Həyatı sıfırdan başalayacağıq”
Pol Pot inqilabın ən qanlısı və radikalı olmaqda qərarlı idi. "Madəm ki,
bu qədər çəkilən çiləyə baxmayaraq kapitalist yaşam tərzi varlığını davam etdirəcək,
o zaman bunu etməyin anlamı nə?” deyirdi. O, Maonun kütlələri mobilizə etməsindən
ilham olaraq Kambocalı 20 yaşdan aşağı yaşlı gəncləri keçmişlə əlaqəni tam məhv
etdirmək üçün hərəkətə keçirdi. Uşaqlar ana-atalarını satır, hətta öz əlləriylə
öldürürdülər. Pol Pota görə həyata dair nə varsa sıfırdan başlayacaqdı. Başdan
ayağa məhv etmə dalğasını sıfır ili adlandırılmasının da səbəbi bu idi.
Pol Pot 1976-cı ildə hazırladığı 4 illik planla ölkənin tabutunu da hazırlamış
oldu. Plana görə, bir il içində ölkənin kənd təsərrüfatı üç qat artacaq və buna
da gübrəsiz, iş texnikası, modern tarla alətləri istifadə etmədən nail
olunacaqdı. Hər dikatator kimi həyatın gerçək tərəflərini görməzdən gəlmişdi. Vətəndaş
müharibəsindən çıxan xalq düyü tarlalarında daha artıq dözə bilmədi. Planı
doldurmaq və qırmızı kxmerlərin salofan torbalarından canını qurtarmaq üçün öz
yeyəcəkləri düyünü də dövlətə verirdilər. Elə bu zaman aclıq başladı. Beləliklə
utopik hərəkat xalqın aclıqdan ölməsinə səbəb olurdu.
" İçimizdəki xainlər” marşı
Bir yandan həqiqətdən və vicdandan tamamən qopmuş Pol Pot və adamları, digər
yandan isə qorxunc həyat şəraiti kambocalıları qırırdı. Yaxşı, bütün bu dəhşət
tablosu qarşılığında Pol Pot nə etdi? Vaxt keçirmədən "daxili düşmənlər” ədəbiyyatına
sarıldı və daha artıq qan tökməyə başladı. Paranoyasıyla birlikdə cürəti də
artırdı. 1977-ci ildə ziyarət etdiyi Çindən düşmən kimi gördüyü Vyetnama qarşı
hərbi və radikal fəaliyyətinə dəstək aldı. Vyetnam və Kamboca arasındakı sərhəd
münaqişələri 1978-ci ildə müharibəyə çevrildi. Pol Pot hesab səhvini burda da
etdi. " Hər kambocalı 30 vyetnamlı öldürərsə müharibədə qalib gələrək” deyir,
bir tərəfdən də Çindən əsgər göndərməsini tələb edirdi. Nə 30-luq hesab özünü
doğrultdu, nə də Çindən əsgər gəldi. Qırmızı kxmerlər çox keçmədən vyetnamlılar
qarşısında aciz duruma düşdü. 1978-ci ilin yeni il ərəfəsində vyetnamlılar 100
min nəfərlə Kambocanı işğal etdi. Ölüm tarlaları gün üzünə çıxdıqdan sonra Pol
Pot vertalyotla Taylanda qaçdı. Vyetnamlılar Kambocada Qırmızı Kxmer rejimindən
qaçanlar daxil olmaqla bir hökümət qurdular.
Brother Number One
Pol Pot hər nə qədər xalqına qan qusdurduğu dövrdə baş nazir olsa da media önünə
çox da çıxmamışdı. Ad-sanı və üzü çətinliklə bilinirdi. Zatən özü də adını çox
istifadə etməmişdi. Həm özünə, həm də kabinet üzvlərinə nömrələr vermişdi və adətən
bu nömrələrdən istifadə edirdilər. Pol Pot bir nömrə idi. Buna görə dünya onu
Brother Number One biləcəkdi. Digər kabinet üzvləri isə önəmlərinə görə iki, üç
və.s nömrələr alırdı.
Dəhşətin qəlbi :S-21
Qırmızı Kxmerlərin qəlbi işgəncə mərkəzi kimi bilinən S-21 idi. Kxmer dilində
adı isə elə də seçilməzdi: Toul Sleng, yəni " Zəhərli ağaclar mərkəzi”. Paytaxt
Pnompendə olan bir məktəb binası Pol Pot və adamları tərəfindən təhlükəsizlik həbsxanasına
çevrilmiş və 4 il ərzində rejimin təhlükəsizliyini təhdid etdiyinə inanılan 15
mindən artıq adam ağla gəlməz vasitələrlə burada öldürülmüşdü. Pol Potun
rejimini təhdid edənlər arasında hamilə qadınlar, uşaqlar və qocalar da var
idi. Burada gənc qızların boğazı kəsilir, hansının ölümə qədər daha çox dözəcəyini
bilmək üçün xronometriya tuturdular. Digər başqa vasitədə isə qarnından
bıçaqlanan insanları içi su dolu çəlləyə atır hansının daha çox dözəcəyinə
baxırdılar. Vaterboarding(əllərindən və ayaqlarından bağlanmış, kürəyi üstdə
uzadılmış məhkumun üzünə yuxarıdan su tökülür. Amma boğulacağı anda ara
verilir. Özünə gəldikdə isə yenidən təkrarlanan-ən iyrənc işgəncə vasitələrindən
biri)qızmış dəmirlə dağlama, elektrik vermək, zorlama, salofan torbanı başa
keçirərək boğmaq(qırmızı kxmerlərin hobbisi idi) dırnaq çıxartmaq və bənzəri
vasitələr S-21dəki günlük həyatın ayrılmaz parçası olmuşdu. Rejimin sonlarına
yaxın sursat çatışmazlığına görə edam olunmalı şəxslər döyülərək öldürülürdü.
Amerika Pol Potun yanında
Yeni hökümət ölkədəki Qırmızı terrorun yaralarını bağlamağa çalışarkən
maraqlı bir şey odu. Amerika yeni höküməti tanımadı. Çünki yeni hökümətin
arxasında duran Şimali Vyetnam idi. O illər döyüşdə yumruğun sayılmadığı,
"insan haqları” kəlməsinin zarafat kimi qəbul edildiyi illər idi. Amerika
Kambocaya yardım göstərilməsinə də mane olurdu. Üstəlik bununla da kifayətlənməmiş,
tarixin ən qanlı canilərindən olan Pol Pota gizli yolla qol-qanad verir, yeni
iqtidara qarşı döyüşməyə davam edən Qırmızı Kxmerlərə ərzaq və silah yardımı
etməyə başlamışdı. Yazıq Kamboca xalqının çiləsi soyuq müharibənin bitməyinə
kimi davam edəcəkdi.
Pol Pot 18 il ərzində həm dövlətlərarası güclər, həm Tayland hərbiçiləri, həm də
öz döyüşçüləri tərəfindən qorundu. Tayland və Şimali Kamboca meşələrindəki düşərgələrdə
qırmızı kxmerlərə ağıl dərsi keçməyi 80-ci illərdə də davam etdirdi. 90-cı illərdən
etibarən xarici dəstəyini itirən Pol Potun kommunist hərəkatı yavaş-yavaş
parçalandı. Kabinetində xarici işlər naziri vəzifəsini tutan qaynı qərbə qaçdı.
Minlərlə Qırmızı Kxmerli də qaynının yolunu getdi. Beləliklə, təşkilat bir dəstə
macəraçıdan ibarət oldu. Qalanların başına isə keçmiş hərbiçi Ta Mok keçdi və
öz adamlarını öldürmək ittihamıyla Pol Potu həbs etdirdi. Nəticədə, bir-birlərinə
düşmən oldular.
Soyqırımın
günahkarları nə edir?
Kambocanın ağla gəlməz soyqırımının memarı olan Pol Pot təbii yolla ölərək
canını qurtarmışdı. Bu gün soyqırım muzeyi kimi xidmət göstərən S-21-in o
zamanki komandiri Kaing Khlek lev( Deuch koduyla da tanınır) bu gün Qırmızı
Kxmer liderlərindən məhkəmə önünə çıxan tək imzadır. Məhkəməsi hələ də davam
edir. Rejimin dövlət başçısı kimi fəaliyyət göstərən Khieu Samphan və rejimin
digər rəhbər şəxslərindən leng Sary və Nuon Chea da soyqırımda günahlandırılır.
Soyuq müharibə bitdi, diktator kəşf edildi
Soyuq müharibə bitdikdən sonra keçmiş müttəfiqləri onu məhkəməyə təslim etmək
üçün fəaliyyətə keçmişdilər. Dövrün ABŞ prezidenti Bill Klinton Pol Potun həbs
olunması üçün əmr verdikdən sonra əməliyyatlar başlandı. Lakin onlar gecikəcəkdilər.
Əsrimizin gördüyü ən dəhşətli soyqırımlardan birinin memarı olan Pol Pot
yatağın ölüm lüksünü yaşamağa nail olmuşdu. Gerisində isə onu ittiham edəcək tək
aktyor olaraq tarixi buraxmışdı.
15 aprel 1998-ci ildə "Amerikanın səsi” radisosunun Kamboca bürosunu dinləyən
Pol Pot Ta Mokun onu ittiham olunması üçün amerikalılara təhvil verməyə
hazırlandığını eşitdikdən sonra səhhəti pisləşdi. Axşam 10-da öldüyü elan
edildi. Kimisinə görə infarktdan ölmüşdü, kimisinə görəsə məhkəmə qorxusundan
intihar etmişdi.
Öz xalqını qan vannasında boğduran, tarixin lənətlilər siyahısına adını
yazdırmağı bacaran bu xəstə ruh 1970-ci illərdə Mao ilə birlikdə dünyanı dəyişdirməyin
ən yaxşı yolunun nə qədər insanın ölümünə səbəb olursa olsun sosial bünövrəni
dağıtmaqdan keçdiyinə inananların simvolu idi. Dünya mediasına keçən son sözləri
isə bu idi:
"Vicdanım çox rahatdı”
Tərcümə etdi: Emin PİRİ