Sürücü mebeli yığacağımız divarı göstərib "siz ölçün, indi xanım gələcək" dedi.

Hər şeyi ölçüb hesablayıb bir xeyli gözlədikdən sonra "xanım” gəldi. Dodaq şişmiş, qaşlar tatuaj, əynində tül bir geyim və altından heç nə yox. Təbii ki, belə durumlara alışqın idik. Çünki onlar bizi kişi gözü ilə yox, fəhlə gözü ilə görürlər.

"Xanım” içəri girən kimi it qaçıb bunun qucağına tullandı. Bu da iti qucaqlayıb öpəndən sonra sürücünü çağırıb "Apar keçən həftə apardığın yerə, bunu yaxşıca çimizdirib təmizləsinlər, amma keçən dəfədən bizə 20 manat borcları var, 60 manat da versən yetər" -dedi.

İlahi, itin həftəlik təmizliyi üçün 80manat...

Birdən pilləkənlərlə əlində bez parçası olan orta yaşlı, nurani və çox gözəl xanımın qalxdığını gördük. Özündən qat-qat çirkin və eybəcər olan Evin xanımına yaxınlaşıb "xanım, hər yeri təmizlədim, icazə versəniz uşağı həkimə aparmalıyam" dedi. "Xanım” tərs-tərs baxıb narazı səs tonu ilə "get" dedi.

Arxasını dönüb getmək istəyəndə geri dönüb "Xanım, varsa 20-30 manat verə bilərsiniz? Həkimə..."

Evin "xanım”ı qadının sözünü yarımçıq kəsib yüksək tonla "15gün əvvəl vermişəm də pul, maaşa 15 gün var hələ, pul yoxdu" dedi.

Elə bildim başıma qaynar su töküldü. İtin baxımına həftəlik 80 manatı qıyan biri evini təmizləyib pırıl-pırıl edən birinə 20-30 manatı verək istəmir.

Qadının aşağı düşdüyünü görüb maşından nəsə götürmək bəhanəsi ilə arxasından aşağı düşdüm. Və yaxınlaşıb "Xanım, mən sizə 20-30 manat verim, biz mebeli gətirənə kimi siz maaşı alıb qaytararsınız" dedim. Qadın mənə baxıb "Çox sağ ol, qardaş, eybi yox, maaş alanda gedərik həkimə " dedi.

Heç nə deyə bilmədim və başımı aşağı salıb yuxarı qalxdım.

Evin "xanım”ı küncə yığdıracağı xırda bir mebelin qiymətini soruşanda hesablayıb dəftərə 350 manat yazdığım halda 700 manat dedim.