Əbülfət MƏDƏTOĞLU: KÜÇƏLƏRİ...
Bir kimsə bilmirki , nə axtarıram
Yenə dolaşıram tək, küçələri...
Tanış ünvanlarda bir an dururam -
Sən də yaddaşına ək, küçələri...
Bu Sahil ... bu bulvar, bu da Təzəpir
Ruhumuz da birdi, cismimiz də bir!
Gətir qulağına söyləyim bir sirr-
Bölüb eyləmişəm lək, küçələri!
Nağıldı səninlə ötən anlarım...
İçimdə nur kimi bitən anlarım...
Sənsiz yaşanmayan - itən anlarım -
Qəlbimə şırım tək, çək küçələri!
Susub boylanıram ordan bəridə...
Qatıb bir-birinə xeyir-şəri də!
Götür as qəlbimi kirpik şəridə -
O edib özünə hək küçələri!
Ömrü yarma edir dərd kirkirəsi
Bəxtin dil qanmayan sərt kirkirəsi!
Məni bəyənməyən bu Yer kürəsi -
Deyir, ay Əbülfət, sək . küçələri!