Cərrah Dr.Elnur Pirəliyev “Həkim məsləhəti” rubrikasında öz tövsiyələrini bölüşüb
Boğazda əllə hiss olunan törəmə, səsdə dəyişiklik, kəskin arıqlama və ya kökəlmə, saç tökülməsi, halsızlıq, yorğunluq kimi əlamətlər varsa, insanların ağlına gələn ilk ehtimallardan biri də ur, yəni qalxanabənzər vəzinin xəstəliyidir.
Bəs bu xəstəlik necə yaranır, əlamətləri hansılardır və müalicəsi necədir?
Adalet.az-ın məlumatına görə, izləyicilərimiz tərəfindən tez-tez verilən bu suallar ətrafında Mərkəzi Gömrük Hospitalının ümumi cərrahı Dr.Elnur Pirəliyev "Həkim məsləhəti” rubrikasında öz tövsiyələri ilə bölüşüb.
-Düyünlü ur olduğundan şübhələnən insan nə etməlidir?
Belə hallarda isə insanların atacağı ən doğru addım ya endokrinoloqa, ya da endokrin cərrahına müraciət etməkdir. İlk mərhələdə qanda tiroid hormon analizlərinə baxılır və boyunun ultrasəs müayinəsi olunur.
-Düyünlü ur boyunda ağrıya səbəb ola bilərmi?
- Düyünlü ur adətən ağrı vermir. Ancaq düyünün ölçüləri çox böyük olarsa, bu zaman ətraf toxuma və orqanlara mexaniki basqıya səbəb olaraq ağrı verər. Başqa bir halda isə, Tiroid düyününün öz içinə qanama verməsi nəticəsində ağrı ola bilər. Onu da qeyd etmək istərdim ki, bəzən düynülü uru olan xəstələrdə bu, boğaz ağrısı, tonzillit, faringit kimi boğazın başqa xəstəlikləri ilə qarışır ki, bu da xəstələrin yanlış müalicə almağına səbəb olur. Ona görə də, 3 həftədən uzun çəkən, təkrarlanan və müalicə ilə keçməyən boğaz ağrıları olan xəstələrin mütləq endokrinoloqa müraciət etmələri məsləhət görülür.