Nigar kimi gənclərimizlə fəxr edirik!
Nəinki hər bir Azərbaycan gəncinin, eləcə də hər bir azərbaycanlının borcudur ki, məmləkətimizin adını dünya dövlətləri arasında tanıda, rəğbət qazandıra. Hər belə vətəndaşımızla fəxr etmək də bizim borcumuzdu. Bu günlərdə ABŞ-ın Harvard Universitetindəki Harvard Biznes Məktəbində (HBS) magistr dərəcəsinə qəbul olunan Nigar Mövsümlü ağlı, savadı, çalışqanlığı ilə hamının rəğbətini qazandı, uğuru ilə nəinki yaxınlarını –doğmalarını, onu tanımayanları da sevindirdi. Əslən ermənilər tərəfindən işğal olunmuş Xocavənd rayonunun Muğanlı kəndindən olan
Nigar İlyas qızı Mövsümlü Qarabağ da tanınmış nəslin nümayəndəsidir.
"O yerli batalyon komandiri olmuş İlyas Hüseynovun qızıdır . Qarabağ müharibəsində, düşmənə qarşı gedən döyüşlərində Nigarın atası da, əmiləri də igidliklə döyüşüb” .
Bu sözlər mərhum İlyas Hüseynovun döyüş yoldaşı Əli Əsgərova məxsusdu. O, sözlərinə davam edərək bildirib ki, Nigarın bu uğuru ən çox atasının döyüş yoldaşlarını sevindirdi:” Elə camaatımızın da qəlbini fərəh və qürur hissi ilə doldurdu! Nigar atasına layiq övladdı. Hələ balaca olanda məktəbdəki uğurları, təhsil və təlim yolunda atdığı ciddi addımlar, qazandığı tərifnamələr, təşəkkürnamələr gələcəkdə hamını, xüsusən atasının ruhunu sevindirəcəyinə əmin idik”.
Qeyd edək ki, Nigar 10 avqust 1993-ü ildə anadan olub. İlk ali təhsilini Qafqaz Universitetində Biznesin idarə edilməsi ixtisası üzrə alan Nigar təhsilini Türkiyənin Hacəttəpə Universitetində davam etdirib. 2014-2017-ci illərdə Deloitte Audit ve Konsaltinq şirkətində Auditor/Konsultant, 2017-ci ildən hal-hazıra kimi "Unilever” istehsalatçı firmasında Azərbaycan və Gürcüstan ölkələri üzrə müdir müavini vəzifəsində çalışıb. O, əlaçı olduğu qədərdə vətənpərvərdi. Dağlıq Qarabağın Azərbaycanlı İcması İdarə Heyətinin üzvüdür. Nigar eyni zamanda, Qarabağ həqiqətlərini dünyaya çatdırmaq işində beynəlxalq gənclər və tələbə arenalarında daim fəaldır”.
Qəzetin kollektivi adından mərhum komandir İlyas Hüseynova Allahdan rəhmət, onun qızı- fəxrimiz Nigara isə uğurlar arzulayırıq!
Əntiqə Rəşid