Moderator.az-a açıqlamasında yazıçı İradə Tuncay bildirdi ki, televiziyalar Milli Televiziya və Radio Şurasının (MTRŞ) xəbərdarlığına məhəl qoymursa, onda bizim danışmağımız da hədərdi:

"Əgər bu gün Milli Televiziya və Radio Şurası (MTRŞ) telekanallara xəbərdarlıq edirsə və əgər ortada nəticə yoxdursa, bu haqda bizim nəsə deməyimizin də heç bir mənası yoxdur. Bu gün televiziyalarımızda heç kimə məhəl qoyulmur. Əvvəl bu qədər reklam da yox idi. Bütün dünyada kütləvi informasiya vasitələrinin gəlir yeri reklamdı, yəni nə tiraj, nə də reytinq gəlir yeri deyil. Reytinqin nə qədər çoxdursa, o qədər də reklam təklifi alırsan. İndi də reklam şadlıq saraylarından, həkimlərdən, süni mayalanmadan gəlir. Əslində həkimlərin reklam olunması düzgün deyil, çünki bunun çox ağır fəsadları ola bilər. Amma indi bunu kimə deyirsən, nə öz yerindədir ki, bu da öz yerində ola?”.

Qeyd edək ki, "Reklam haqqında” Azərbaycan Respublikası Qanunun 29.5-ci maddəsinin tələbinə əsasən, hamiləliyin süni yolla pozulması və süni mayalanma üzrə tibbi xidmətin reklamı qadağandır.