Əbülfət MƏDƏTOĞLU: QARA DƏNİZLƏ DAN ÜZÜ SÖHBƏTİ
Mən kiməm ki, haqq danam
Görüş umdum Haqqdan ,an!
Bir elçiyəm - Haqdanam -
Özümdən özüm sənə!
Ömür bitər bir an ki,
Sənlə keçir hər an ki!
Sına səbri, inan ki, -
Bitməz heç sözüm sənə!..
Dünyaca günahları
Yıx, boynuma ahları...
Açılan sabahları -
Qoy baxsın gözüm sənə...
Söykəndiyim dizin ver
Cığırın ver, izin ver...
Sən dözmürsən, izin ver -
Ölüncə dözüm sənə...
Ömür an yonqarıdı
Ərimiş yaz qarıdı...
Xatirə tonqalıdı -
Külüm, həm közüm sənə!