İlham İsmayıl: Dunay da tərsinə axmadı, Araz da Qara dənizə axmayacaq...
Ermənistanın Respublika partiyasının mətbuat katibi Eduard
Şarmazanov Feysbuk səhifəsində Qarabağ münaqişəsi ilə bağlı qeydlərini
yazıb: "Daxili siyasi fikir ayrılıqlarımıza baxmayaraq,
azərbaycanlıların bulanıq suda balıq tutmasına imkan verməyəcəyik...
Araz öz məcrasını dəyişdirib Qara dənizə axmağa başlayar, amma Qarabağ
Azərbaycanın tərkibinə daxil olmaz..."
Bu
sözlər VII-ci sinifdə oxuyanda SSRİ tarixi kitabından oxuduğum sərkərdə
Suvorovun İzmail qalasına hücumunu xatırlatdı. Aleksandr Suvorov Dunay
sahilindəki Türkiyəyə məxsus İzmail qalasına hücum etməzdən əvvəl
qalanın rəisi Mehmet paşaya ultimatum göndərir ki, qalanı döyüşsüz
təslim etsin. Suvorovun ultimatumuna Mehmet paşanın cavabı belə olmuşdu:
"Dunay tərsinə axar, göylər yerə tökülər, İzmaili təslim etmərəm”. İki
günlük artilleriya hazırlığından sonra 1791-ci il dekabrın 22-də səhər
saat 5.30-da başlanan hücum 11 saat davam etdi və ruslar İzmail qalasını
aldılar. Nə Dunay tərsinə axdı, nə göylər yerə töküldü.
Bu,
Osmanlının, qardaş Türkiyənin məğlubiyyət döyüşü olsa da, xatırlatmaqda
məqsəd tamam başqadır. Yunan əsilli (bəzi mənbələrdə isə yezidi kürd
olduğu deyilir) Eduard Şarmazanovun Azərbaycana, Türkə tarixi nifrəti
məlumdur. Sadəcə olaraq bu cür populist deyimlər bizi qətiyyən ruhdan
salmamalıdır. İzmail qalasının tarixini də xatırlatmaqda və paralellər
aparmaqda bənzər yekəxana bəyanatların tarixdə necə yekunlaşdığını
göstərmək, eyni zamanda açılmayan sabahların özü ilə nələr gətirəcəyini
düşmənin də, elə özümüzün də diqqətinə çatdırmaq istədim.
Dostumuz
Sultan Laçın bu məlumatı yayandan sonra sual edir: "Buna nə ilə cavab
verək? Tarixi, hüquqi, siyasi fakt və arqumentlərlə, yoxsa bəyanat və
notalarla? Bunları bütün dünyaya yüz il də car çəksək, faydası
olmayacaq... Qarabağ qayıtmayacaq... Yalnız silahlı savaş, savaş,
savaş!..”
Laçınlı qaçqın Sultan düz sual verib,
düz də nəticə çıxarıb. Şarmazanov müxalifətdə olan bir partiyanın
mətbuat katibidir və ona nə bəyanatla, nə də nota ilə cavab vermək lazım
deyil. Yenə həmin İzmail qalasının alınmasına qayıdıram. Üç il
Rusiyanın üç sərkərdəsi İzmaili ala bilməmişdi. Sonunda Potyomkin bu işi
Suvorova həvalə edir. Döyüşdə 29 min türk əsgəri, 4 min rus əsgəri
ölür. Amma, qala alınır. Azərbaycanın saysız-hesabsız generallarının
içərisində ola bilməz ki, bir rayonumuzu geri ala biləcək
komandir-general olmasın. Mən hələ bütöv Qarabağı demirəm, bir
rayonumuzu deyirəm, çünki bu bir rayon bizim gələcək qələbəmizin
fundamentidir. Hətta, deyərdim ki, düşməni bizim şərtlərlə danışıqlar
masası arxasına otuzduracaq bir rayondur.
Şarmazanov
bilirsiz niyə belə yekəxana, həyasız qeydlər yazır? Atəşkəsdən bəri-25
ildən çoxdur ki, sayları hər il artsa da generallarımız bir yaşayış
məntəqəsini də azad edə bilməyiblər, ona görə bu yunan əsilli, yezidi
kürd əsilli birisi Arazı Qara dənizə axıtdırır. Potyomkin bu işi sonunda
dahi bir sərkərdəyə tapşırdı. Biz kimə tapşıraq? İstərdim ki, bu sualı
generallar da özünə versin.
İki gün əvvəlki
yazımda qeyd etmişdim ki, ordumuz haqqında sonadək bilgimiz yoxdur,
gələn xəbərlər isə heç də ürəkaçan deyil. Nazirlikdə baş verən hər
hansı bir neqativ hal, münasibətlər müvafiq qurum tərəfindən zamanında
aşkarlanmalı və anındaca Ali Baş Komandana məlumat verilməlidir. Neqativ
hallar, şəxsi zəmində gərgin münasibətlər bəzən döyüş zamanı təxribata
gətirib çıxarır, necə deyərlər, sabah müharibə başlayanda, mühüm işə
badalaq vurula bilər.
Bir gün bizim də Suvorov
Qarabağı azad etməzdən əvvəl ermənilərə ultimatum verəcək ki, çıxın
işğal etdiyiniz torpaqlarımızdan. Və qoy, o zaman Şarmazanov (lar) Arazı
Qara dənizə axıtmağı ilə bizi hədələsin, içimizdə qələbə hissi, vətəni
azad etmək ruhu olandan sonra 11 saat yetərli olacaq ki, düşmən ağ
bayrağını qaldırsın və Həkəri Araza, Araz da Kürə axmaqda davam etsin.
Çətini o ruhu yaradıb öndə bizim Suvorovun getməsidir.
Digər Xəbərlər
18 Aprel 2024 15:06