Əbülfət MƏDƏTOĞLU: Bu dənizin adı Qara, günü ağ
ƏBÜLFƏT
Daş da həmən, tərəzin də yerində
Sağalmayıb, mərəzin də yerində...
Ömür adlı çərəzin də yerində -
Əbülfət!
Qışı - qışdı, yayı -yaydı - sənə nə
Önə çıxıb, çox da döymə sinənə...
Qurbanlıqsan ürəyinə sinənə -
Əbülfət!
Bu dənizin adı Qara, günü ağ
İşlərinə qarışmağın bir günah!
Tutar səni çəkdirdiyin bir gün ah! -
Əbülfət...
Sözə qatma bu məscidi, kilsəni...
Oğul! - deyib anacaqdı kim səni?
Varlığınla ovutmadın kimsəni -
Əbülfət...
Məhəbbətsiz, can dostlarsız ömür boş
Yığ dəftəri, at qələmi xoşaxoş!
Sən özünü yol üstəki köçə qoş -
Əbülfət!
Trabzon , 2019