Uşaq pulu söhbəti gündəmdən düşmür. Elə bir zümrə nümayəndəsi yoxdur ki, bu barədə təklif irəli sürməsin. Bilən də yazır, bilməyən də.

Hörmətli Hadı Rəcəbli bir açıqlamasında bildirib ki, 3 yaşa qədər cocuqlara uşaq pulu bərpa oluna bilər.

Bizim fikrimizcə, 6 yaşa qədər uşaq pulu verilməsi daha normaldı, çünki 6 yaşdan sonra uşaqlar çalışıb həm özlərini saxlaya bilərlər, həm də cəmiyyətə bir xeyirləri dəyər, iqtisadiyyatımız daha yaxşı inkişaf edər.

İndiki uşaqlar Kərəmovdan acizdilər?

Kərəmov 6 yaşında atasına qoşulub kolxoz işinə getmişdi. Özü də hansı zamanda? Kompüter yox, internet yox, televiziyalar nə gündə.

İndiki uşaqlar cin kimi bir şeydi, 4 yaşlarında internetdə Markı barmaqlarına dolaya bilirlər, dünyanın harasından desən xəbər verə bilirlər, proqram yükləyirlər, sosial şəbəkələrə girirlər. Hələ məktəbə getməmiş, odnoklassikdədirlər.

Ona görə uşaq pulunu 6 yaşadək vermək daha normaldı. Sonra maşallah, özləri özlərini saxlaya bilərlər, hələ ailə büdcəsinə xeyirləri də dəyə bilər.