Əbülfət Mədətoğlundan yeni şeir: SƏNƏ
Görüş umdum Haqdan an,
Mən kiməmki, haqq danam...
Bir elçiyəm, Haqdanam -
Özümdən özüm sənə!
Ömür bitən bir andı
Sənsizdirsə - virandı..
Sına səbri - inandır -
Bitməz heç sözüm sənə!
Dünyaca günahları
Yıx boynuma ahları...
Açılan sabahları -
Qoy baxsın gözüm sənə!
Cığırın , ya izin ver,
Baş qoymağa dizin ver...
Sən dözmürsən, izin ver -
Ölüncə dözüm sənə!
Ömür - an yonqarıdı
Yaşamın son qarıdı...
Xatirə tonqalıdı -
Külüm, həm közüm sənə!..