TANRI PİYALƏSİ- İÇMIRSƏN, NƏDƏN?

Kül olub xatirən, ya da bayadıb,

Çəkdiyim ahlarım sevinc, vayadı,

Nədən ürəyimdən keçmirsən, nədən?

Bu qan vicdanını sənə satacaq,

Vicdanın susacaq, rahat yatacaq,

Qəlbimə kəfəni biçmirsən, nədən?

Həyatdan doymuşam, müşk axtarıram,

Neynirəm, boş yerə başmaq dağıdam,

Sən ki, köz-odumda bişmirsən, nədən?

Qayıdıb getməyə tələsdi yenə,

Bu təzə dil açan bir səsdi sənə,

Eşidib rəsmini çəkmirsən, nədən?

Adınla çəkilən sancılar gülür,

Göydən nur tökülür, damcılar gülür,

Tanrı piyaləsi - içmirsən, nədən?

Səninçün həqiqət,nağıldı dünya?

Üç alma düşəndə bağırdı dünya:

Gerçəklə nağılı seçmirsən, nədən?!!

Saat: 03.50

DANIŞAR

Ağ yolda iz açan qələm danışar.

Qəlbimin sözüdür gözümdəki nəm,

Məni qədərinin yaxın dostu san,

Nə bez gileyimdən,nə də, dost, usan,

Sazım nalə çəkər, telim danışar.

Sözünü ruhundan asar, danışmaz,

Səbrini bağrına basar, danışmaz,

Dil susar, gözümdə selim danışar.

Çalışar tox tuta hər vaxt özünü,

Göz yaşım söndürməz qəlbim közünü,

Yandıqca atəşdə külüm danışar.

Həftələr can alan ağı kimidir,

Aylar ayağımin bağı kimidir,

Gün- günə calanar, ilim danışar.

MƏNİ

Yanında durmuşam, xəyal kimiyəm,

Tut, saxla baxışla, gözündə məni,

Ruhunda açılmış bir yol kimiyəm,

Gəlirəm, bağışla, özun də məni.!

Yuxumda az axtar, məni az ara,

Sənsiz cismim düşüb dərdə, azara,

Əlinlə qoy məni, qoşa məzara,

Suya çək yağışla, gözündə məni.

Doğransam ruhumla dilim-dilim də,

Kimsəyə "sevdamsan”- deməz, dilim də,

Bir sənin adın var, vallah, dilimdə,

Sən sına sal daşla, dözümdə məni.

Deyirsən, gəlmə heç sən mənə sarı,

Sənsizlik ölümdü gözümdə sarı,

Səninlə aramda duran hasarı

Gəl götür barışla, süz indi məni.

Baxsan, görərsən ki, viran, söz bağım,

Baxır gözlərimdən toran, göz bağım,

Yazmasam, qan olar yaram, söz bağım!

Sirr oldum bu yaşla, çöz, indi məni!

BU MƏHƏBBƏT GECDİ DAHA

Sən mənim şeirimin sevgi dənizi,

Dalğanda üzməyə, vallah, gəmim yox.

Hər sənə baxanda solur bənizim,

Içındə qərq olub, batsam,qəmim yox,

Batmaq istəyirəm dərinliklərə,

Inci,mirvarılər dolsun içimə,

Ya mən tələsmişəm, sən yubanmısan,

Sevgidə nə deyim, belə biçimə.

Hərdən gözlərimdən gəlib keçirsən,

Gecdi bu sevgimiz, gecdi deyirəm.

Illərdir dodağım həsrət içsə də,

Daha yubanmışıq, keçdi, deyirəm.

Həyatda heç nəyə vaxt qoymaq olmur,

Sevgi sevən üçün zamansız olur,

Hər sevən ürəkdə taxt qurmaq olmur,

Həqiqi sevgilər yalansız olur.

Sevgini çörəyim, suyum bilirəm,

Aclıqdan hər zaman tox oluram mən,

Sən mənim şeirimin sevgi nağılı,

Hər gün bu nağılda yox oluram mən.

ŞAHBUZUN

Yazın əvvəlində çıxmışdım yola,

Mənə gəl-gəl dedi, özü Şahbuzun,

Yığdım kəklikotun, daddım yarpızın,

Laləyə bürünüb düzü Şahbuzun

Dolandım yolları dağ dərəsində,

Sular şaqqıldayır çay bərəsində,

Dağların ətri var bal-kərəsində,

Bizi qonaq etdi, yazı Şahbuzun

Güldü, gülüşüylə güllər açıldı,

Gəldi, gəlişiylə yollar açıldı,

Qonaq qarşıladı qollar açıldı,

Nə xoşdu ədası, nazı Şahbuzun.

Aşıqlar oynadı, sazla-söz dedi,

Dəyər gözəllərə,dəyər göz dedi,

Dağların sirrini indi çöz dedi,

Könlümü lal etdi sazı Şahbuzun!

Bişdi unnucadan dadlı kətəsi,

Çaşırı, bolusu dağda bitəsi ,

Gözəllikdə varmı bundan ötəsi,

Səslənir, bax, xoş avazı Şahbuzun!

BU HƏYATA ƏL EYLƏ

Son qismətim, tale payım, hardasan,

Yaşat məni, Yaradana qul elə!

Ömrum – günüm, demə, sən də dardasan

, Dardan qurtul, bu ömrümə gəl elə!

Keç qəlbimdən, yaraları sarı sən,

Hey çəkirsən yaralara sarı sən,

Urəyində bir künc ayır barı sən,

Bir çiçəyi öz bağında gül elə.

Həyat sınaq meydanıdı,biləsən,

Bütöv ömrü qurban vermə ilə sən,

Gözlərimə göz bəbəyi, giləsən,

Gözlərindən toru götür, tul elə.

Sevgisinə yanıq düşdü bu ürək,

Öz suyuna qanıq düşdü bu ürək,

Çox ünvana tanıq düşdü bu ürək,

Yol vermədi heç birinə, yol elə.

Bir ömrü də yarıtmadı bu baxtım,

Öz yarasın sarıtmadı bu baxtım,

Öz içimdə susqun qaldım, ya baxdım,

Səssiz qalan sözlərimi dil elə.

Sevinmişəm, yaş gələndə yaş ustə,

Meyvəsiz il sanki gəldi daş üstə,

Deyən yoxdu, gözün altda, qaş üstə,

Gözlə qaşın arasına dol elə.

Ay Təranə, yol verən yolda qalar,

Ömür zirvə, yorulan yalda qalar,

Tələsməyən sonunda dalda qalar,

Addım- addım bu yollarda qal elə

Ad günündü, sevin belə, gül belə,

Illər yandı, sevinmədi kül belə,

Bu təbrikə dedi neçə dil belə:

Daha vaxtdı, bu həyata əl elə.