hacklink Adalet.az | Oqtay RZA: Şeir payı da var riyaziyyatın! Adalet.az | Oqtay RZA: Şeir payı da var riyaziyyatın! Adalet.az | Ədalət -
ANA SƏHİFƏ / ƏDƏBİYYAT

Oqtay RZA: Şeir payı da var riyaziyyatın!

6258    |   2019-06-24 16:20
Şriftin ölçüsü:
A+ Böyütmək
A+ Balacalaşdır


  1. Sıfır

Bir görün necədir, nəçidir sıfır:

Vurulsa – varlığı heç edir sıfır.

Sıfırın ortada dəyəri vardır,

Sağda yazılanda güc qat-qat artır.

Öndə görünəndə ziyansızdır o!

Sıfır müstəqildir, həyansızdır o!

* * *

Möhtərəm filosof! De, nədir həyat!

Bəlkə tamaşadır, səhnədir həyat?

Çatsın nəzərinə şöhrətpərəstin:

Sıfırdan-sıfıra yol gedir həyat!

  1. Bir

Bir haray əsrlik səda olubdur,

Sinəmə sancılan cida olubdur –

Zəngəzur pay kimi verilib yada,

Naxçıvan quruda ada olubdur…

* * *

Bir böyük həsrətin sonsuz kədəri

Məni yandıracaq hər gün, həmişə:

Anam son mənzilə köçəndən bəri

Yadımdan çıxır ki, yadıma düşə!

* * *

Rəis hərdən gülümsəyir,

Bərkdən «bir-bir gəlin!» deyir.

* * *

Bircə sənsən gümanım,

Ümidim, and-amanım.

* * *

Bilinməzdi kövrəldiyim –

Gözüm yaşla dolmasaydı;

Uzaq səfər yaxşı şeydir,

«Birdən» sözü olmasaydı!

* * *

Birinci sinifdə oxuyanda mən

Dava tufanları gəlirdi Qərbdən…

* * *

Munis heyvanları sayır birbəbir:

Bir bəbir, bir ayı, bir pələng, bir şir…

BİRGÜL

Gəlib əlvan geyimli yaz,

Çiçək çıxıb dizə, Birgül!

«Bir gül ilə bahar olmaz»;

İnanma bu sözə, Birgül.

Torpağı bərk qucaqladın,

Gah sevindin, gah ağladın;

Qiyamətdir hüsnün, adın,

Gəlməyəsən gözə, Birgül!

Oqtay Zənginin balası,

Yadındamı Qız qalası?

Əfsanəyə qulaq asıb,

Döndün oda, közə, Birgül!

Bir də seyr et Bakını sən,

Görün xoşbəxt, danış şən-şən.

Yanardağın zirvəsindən

Bax laləli düzə, Birgül!

Sülh şərqisi yaya-yaya,

Yet köməyə, çat haraya!

Salam apar Ankaraya

Salam gətir bizə, Birgül!

  1. Beş

Tam orta məktəbdə fəal olmuşam,

Dərslərdə «beş», yəni «əla» almışam.

* * *

Bir vaxt çoxmillətli Sovetlər vardı,

«Beşillik plan»la addımlayardı.

* * *

Bakıda hələlik rəqibi yoxdur –

Ona «Beşmərtəbə» deyənlər çoxdur.

* * *

Tamaşaya baxmaq üçün

Yaxın-uzaq gələrdi –

«Beşmanatlıq gəlin» onda

Tez-tez göstərilərdi,

* * *

Nizami sözlərdən inci düzərək,

Beş dastan yaradıb məşhur «Xəmsə»tək.

* * *

Dövlət rəmzləri yaxşı bəllidir,

Ulduz çox bayraqda beş guşəlidir.

* * *

Bu tüfəng keçmişdən miras qalandır.

Adı əvvəlkitək – «Beşatılan»dır.

* * *

Kvintet – peşəkar beş musiqiçi,

Hamısı mehriban, xoş musiqiçi.

* * *

Hökm var çox uzun, hökm var qısa,

Verilib «Beşinci dəstə»yə cəza…

* * *

Anıram dağ aşıb, çay keçməyimi,

Məşhur «Beşbulaq»dan su içməyimi.

* * *

Tək-tək kristalın səthində hamar

«Pentaqon» adlanan beşbucaqlı var.

* * *

Dayandur şeirlə sağaldar yara,

Doğulub beş əziz qardaşdan sonra.

* * *

«Beşbarmaq» adlanan dağa qalxmışam,

Zirvədən Xəzərə xeyli baxmışam.

* * *

Gəzib dolaşmışam neçə diyarda,

Görəsən «Beştau» yerləşir harda?

* * *

Ölkədə həm uğur, həm yüksəliş var,

Çoxdandır həftədə beşgünlük iş var!

4. Yeddi

Qərinələr yola salan əsər var:

«Yeddi gözəl» – Nizamidən yadigar!

Göyün yeddi qatındakı ehtişam –

Ulduzların məclisidir hər axşam.

Yeddi oymaq. Yeddi oba. Yeddi kənd.

Sonuncunun təzə adı – Yenikənd.

«Yeddi oğul …» filmimizi biz gərək

Mahal-mahal, diyar-diyar göstərək!

Göy qurşağı – fizikada spektr,

Səmadakı yeddi rəngli ipəkdir.

Bitirəndə yeddiillik məktəbi,

Yayılırdı təzə dövrün tələbi.

Həftədəki mərtəbələr – yeddi gün,

Uğurlardan çələng hörək xalq üçün!

Ağacların altısı da cökəymiş,

Bağban gərək yeddincini əkəymiş.

Qışda yatan ayını yaz ayıldır,

Yeddinci ay həm eylül, həm iyuldur.

Altı qardaş – altı dayım var idi,

Anam Xanım – «Bircəbacı» nur idi.

Başqalaşıb həm təcrübə, həm bilik...

Daha yoxdur sirkə qabı «yeddilik».

Xəzərdədir Yeddi gəmi adası,

Hərəsinin öz yükü, səs-sədası.

Nəhəng Atlantida qəflətən batır…

Yeddinci qurutək su altındadır.

Koroğlu zövq alıb hansı ədəddən?

Yeddi min yeddi yüz yetmiş yeddidən!




İmza:
SON XƏBƏRLƏR
2019-12-06


VİDEO



ƏDALƏT BU GÜN
Redaktor seçimi
FOTOREPORTAJ
GÜNÜN SİTATI
SORĞU
Dövlət xəstəxanaları pulludu, yoxsa pulsuz?

Pullu (87.5%)
Pullsuz (12.5%)

ÇOX OXUNAN
GÜNÜN LƏTİFƏSİ
"- Orda danışdığın anektodu mənə də danışa bilərsən?"

"Lavrov: 

- Hansını? Mollanın Teymurla olan fil anektodunu?"



digər lətifələr
ARXİV
FACEBOOK