Qəşəm İsabəyli: Əriştə həkimdir ey...
–Əriştə həkimdir, ey,
Mən bilirəm, bala, mən –
Ölünü dirildərəm
Əriştəylə,Vallah, mən!
Ay Anarım, hər həkim
Çatmaz ona hünərdə –
Dizlər çökdürüb, bala,
Əriştə neçə dərdə!
Yorğunsan... əriştə vur?!
Soyuqlamısan... buyur?!
Bir kasa da bəsindi,
Sap-sağlam ayağa dur!
–Ay nənə, təriflədin,
Ağzımın suyu axdı,
Mən bilən beləsini
Yeməmişəm ha vaxtdı!
Tezol, görüm, ver bura,
Kasayla göndər bura.
–Hazırdı hər yarağım –
Bu–, soğanım, bu –yağım,
Turşum, yarpızım, duzum,
Bu da qazan dolusu.
Dayan, kündəni yayım,
Fətir kəsim, doğrayım.
Əlimi görməyəcəksən
İndi, balası, işdə –
Gözünü yum… aç…buyur,
Bu da sənə əriştə.
Qaşıq-qaşıq vururam,
Damcı-damcı tər çıxır.
Canımdan-ciyərimdən
Elə bil zəhər çıxır.
Haçan yuxu aparıb,
Haçan yatmışam, görən.
Ayılan da baxıram,
Sappa-sağolmuşam mən!
Düzü çaşıb qalmışam
Bu işə, bu iştəyə,
Kimə təşəkkür edim –
Nənəyə…
Əriştəyə?!