Tanınmış şair Murad Köhnəqala 12 min manatlıq aliment borcuna görə Tovuz rayon Məhkəməsi tərəfindən 15 sutkalıq həbs edilib. Azərbaycanda hər gün xeyli adam aliment ödəyə bilmədiyi üçün həbslə cəzalandırılır. Aliment ödəmək imkanı olduğu halda ödəməkdən imtina edənlərin məsuliyyətə cəlb edilməsi, əlbəttə, tamamilə qanunauyğundur. Ancaq heç bir yerdə işləməyən, aliment ödəmək imkanı olmayan şəxsin həbsə atılmasının hansı fayda verəcəyi müzakirə predmetidir. İşsizlikdən aliment ödəyə bilməyən şəxsləri həbsə atmaq əvəzinə, onları müəyyən işlə təmin etmək və işləyib, həm özünü dolandırmasına, həm də keçmiş ailəsinə aliment ödəməsinə şərait yaratmaq daha yaxşı çıxış yolu olmazmı?

Məsələ ilə bağlı Bakupost.az-a tanınmış yazıçı, millət vəkili Aqil Abbas açıqlamasında bildirib ki, aliment ödəməkdən imtina edənlərin qanun qarşısında cavab verməsi lazımdır, çünki bəzi şəxslər bundan qəsdən boyun qaçırır: "Ancaq kimsə işləmirsə, aliment ödəməyə imkanı yoxdursa, onu həbsə atmağın da heç bir mənası yoxdur. Həbsdə işləyib pul qazanacaq? Azadlıqda olsa, yenə bir şansı olardı”.

Deputat şair M.Köhnəqalanın həbsini də şərh edib. O deyib ki, M.Köhnəqala onun dostudur və uşaqlarına bugünə qədər nələr etdiyini bilir: "Mən indi hər şeyi demək istəmirəm, ancaq Muradın uşaqlarını necə sevdiyini, onlar üçün nə etdiyini bilirəm. Murad neyləməliydi, uşağına pul verəndə çek almalıydı? Bu günə qədər heç kim heç nə tələb etməyib. Borc yığılıb 12 min manata çatıb. Birdən birə adamı həbsə atırlar. Bu məni çox narahat edir. Murad çox istedadlı, yüksək ədəbi savada və bacarığa sahib adamdır. Onun dostları da arxasındadı. Və tələb olunan pulu da köməkləşib ödəyəcəklər”.

A.Abbas Milli Məclisdə aliment həbsləri ilə bağlı qanuna dəyişiklik təklif etməsi məsələsinə barədə isə deyib ki, qanuna hansısa formada dəyişiklik etmək qəsdən aliment ödəməyən şəxslərin əlini gücləndirə bilər: "Bir çox adam qəsdən aliment ödəmir. Qanuna dəyişiklik eləmək belə halların artmasına səbəb olar. Ancaq hansısa formada bir düzəliş etmək lazımdı ki, aliment ödəməyə imkanı olmayan adamların həbsə atılmasının da qarşısı alınsın”.