Mayın 31-də BMqT-nin Azərbaycan nümayəndəliyi Aİ-nin maliyyə dəstəyi ilə Azərbaycan Respublikası Xarici İşlər Nazirliyi ilə birgə Bakıda insan alveri ilə mübarizə sahəsində diplomatik missiyaların rolu mövzusunda seminar keçirib.

Seminarın açılış mərasimində Avropa İttifaqının Azərbaycandakı nümayəndəliyinin rəhbəri, səfir Kestutis Cankauskas, Daxili İşlər Nazirliyinin İnsan alverinə qarşı mübarizə üzrə Baş İdarəsinin rəisi Heydər Heydərov, XİN-nin Konsulluq Şöbəsinin rəisi Faiq Bağırov, BMqT-nin Azərbaycandakı nümayəndəliyinin rəhbəri Vladimir Qyorqiyev çıxış ediblər.

Seminarda müzakirə olunan mövzular arasında İnsan alverinə dair məlumatların mübadiləsi üzrə müvafiq dövlət orqanları arasında koordinasiyada çətinliklər və ən yaxşı təcrübələr; insan alveri haqqında diplomatik nümayəndəliklərdə məlumatlılığın artırılması; səfirliklər tərəfindən təyinat ölkəsində insan alveri qurbanlarına ilk köməklik göstərilməsi və insan alveri sahəsində mövcud konsulluqların yardımı və dəstəyi yer alıb.

Seminarda həmçinin, məlumat mübadiləsi və ciddi ehtiyac içində olan miqrantlarına köməkliyin göstərilməsi, diplomatik missiyaların öz təcrübələri, dövlətlər arasında komanda işinin vacibliyi, insan alveri ilə bağlı cinayyətlərin qarşısnın alınması, qurbanların qorunması, cinayətkarların təqibi və bu sahədə tərəfdaşlığın təmin olunması üçün görülmüş effektiv tədbirlər müzakirə olunub.