Əbülfət Mədətoğludan yeni şeir: GƏL, OVUN MƏNDƏ...
Elə bil qazılıb quyu gözümdə
Qaynayır dünyanın suyu gözümdə!
Gözümün sahibi , uyu gözümdə -
Bəlkə mürgüləyəm , bir hovur mən də...
Başına qalıbdı ruhum bu anlar
Ömrümə daş atır vədəsiz banlar!
Səni duyduğum tək sənı , kim anlar?! -
Bir xəlbir qəm götür, sən sovur məndə!
Göyərər əkdiyin - yağıntı varsa
Ruhundan ruhuma çıxıntı varsa...
Nə qədər canında sıxıntı varsa -
Toplayıb sinəmə - sən qovur məndə!
... Özünü çiçək tək topa bilməsən
Özünü , lap tutsan topa , bilməsən
Özündə özünü tapa bilməsən -
Özündən çıxıb gəl , sən ovun məndə!..