Əbülfət MƏDƏTOĞLU: UZAQDAN OXUNAN ŞEİR
Sənin varlığındadı
mənim yaşam payım da!...
Məkan darlığındadı -
boğulan səs - hayım da!..
Pəncərəyə yaxın dur
səsim döyür şüşəni...
Ovut çöldə gecəni -
əldən, dildən düşəni...
Səp ilıq təbəssümü
sən səsimin üstünə...
Dönməsin pəncərəndə -
səsim həsrət büstünə!..
... Varlığındakı məni
baxışla təqdim edim...
Dayandığın məkanın -
başına dönüb gedim...