Əbülfət Mədətoğlu: 1 aprel şeiri
Heç kimi sevməmisən -
məni sevdiyin qədər!
İnanmısan ki , bizi
görüşdürübdü qədər!
Nazıma da dözmüsən
qəm dolu halıma da...
Sən fikir də çözmüsən -
mənim tək zalıma da...
Hər misramı , sözümü
tutiyə tək yığmısan...
İmzamı , həm özümü
ürəyinə sıxmısan...
Çatıb , sən öyündüyün -
dadıma , şairliyim!
Unudulub , gördüyün -
mənim və sairliyim!
Sənə yaşatdıqlarım
həyat -sevinc və kədər...
... Heç kimi sevməmisən -
bilirəm , mənim qədər!