Əbülfət Mədətoğludan yeni şeir: SONUNCUDAN ƏVVƏLKİ PIÇILTI....
Susub səssiz dayandım
bir sükut da boğuldu...
Sükutun ölümündən -
bir kədər də doğuldu...
Heç kim duymadı ancaq
kədəri , nə sükutu...
Tək o saydı olacaq -
gizli gedən süqutu!..
Yaşantımın hər anı
kirpiyimdən asıldı...
Kədərin fətvasıyla -
xəyal dünyam basıldı...
Cırmaqladım içimin
didiklənmiş yaxasın...
Atdı mənim çiynimə -
həsrət dərdin çuxasın...
Bir ömürü üyütdüm
sığındığım bucaqda...
Xəyalını böyütdüm -
mamırlanmış qucaqda...
Sözümün çalarları
qarışdırdı rəngini...
Ömrüm boyu gözlədim -
bir sevginin zəngini!..