Prezident İlham Əliyevin Ağsuya səfəri rayon sakinləri arasında böyük sevincə səbəb oldu.

Adalet.az xəbər verir ki, bunu Trend-ə açıqlamasında Ağsu rayon sakini Güloğlan Həbibov deyib.

Onun sözlərinə görə, dövlət başçısı səfər zamanı əsasən rayon sakinlərinin problemləri ilə maraqlanıb: "Cənab Prezidentin sakinlərlə görüşü, problemlərlə yerində maraqlanması və onların həlli ilə bağlı müvafiq icra orqanlarına verdiyi operativ tapşırıqlar əhalidə ruh yüksəkliyi yaratdı. Ağsu sakinləri bir daha əmin oldu ki, Azərbaycan Prezidentinə arxalanmaqda yanılmayıblar. Səfər zamanı bizim Cənab Prezidentlə görüşümüzə heç bir problem yaradılmadı. Hər bir sakin yaxınlaşaraq Prezidentə öz problemini, sözünü deyə bildi. O, özü buna şərait yaratdı və bütün sakinlərin dərdini dinlədi. Bir daha bəyan etdi ki, əhalinin problemlərini özü daim diqqətdə saxlayır və bu problemlərin həllinə çalışır. Prezident sakinlərlə görüş zamanı xeyli məktublar aldı və söz verdi ki, həmin məktubların hər birinə şəxsən baxacaq, problemləri həll edəcək".

Rayon sakin daha sonra bildirdi ki, Prezident bir daha sübut etdi ki, o, hər bir vətəndaşın prezidentidir və hər bir sakinin probleminə öz problemi kimi baxır: "Dövlət başçısı Ağsuda zəlzələnin ziyan vurduğu mənzillərə də baxış keçirdi, qəzalı vəziyyətdə olan evlərin yenidən tikilməsi ilə şəxsən maraqlandı, lazımi tapşırıqlarını verdi. Artıq Ağsu sakinləri tam arxayındırlar ki, Azərbaycan dövləti daim xalqın, vətəndaşların yanındadır. Əminik ki, Prezident heç vaxt bizi darda qoymayacaq".

Qeyd edək ki, fevralın 5-də və 6-da baş vermiş zəlzələ Şamaxı, İsmayıllı və Ağsu rayonlarında bir sıra fəsadlar törətmişdi. Dövlətimizin başçısının sərəncam və tapşırıqlarına əsasən təbii fəlakətin törətdiyi fəsadlar aradan qaldırılır.

Sərəncamın icrası ilə əlaqədar görülən işlərlə yerində tanış olmaq üçün Azərbaycan Prezidenti İlham Əliyev martın 6-da Ağsu rayonuna səfərə gəlib.