Martın 1-də Xəzər Universitetində"Dillər və ədəbiyyatlar” departamentinin müəllimi şair- tərcüməçi Qardaşxan Əzizxanlı tərəfindən "Dünya ədəbiyyatını öyrənək” layihəsi çərçivəsində Azərbaycan Dillər Universitetinin müəllimi şair, esseist və tərcüməçi Qismət Rüstəmovun iştirakı ilə "Dünya və Azərbaycan şeiri müasir poetik təfəkkür kontekstində” mövzusunda seminar keçirildi.

Üç saatdan çox çəkən seminarda layihə rəhbəri Q.Əzizxanlı Aristotel, Horatsi, Kallimax, Bualo, Höte, Eliot, Paund və başqalarının poeziya haqqında nəzəri fikirlərini misal çəkməklə, ədəbi cərəyanların ümümilikdə ədəbiyyatın inkişafında rolundan söz açdı. Bütövlükdə, dünya və Azərbaycan şeirinin əsas istiqamətləri və s. problem məsələlər müzakirə mövzusu oldu.

Q.Rüstəmov Borxesin dünyadakı bütün sujetləri dörd, Jorj Poltinin isə otuz altı dramaturji situasiyada ümumiləşdirdiyini bildirərək, Nobel mükafatı laureatı Oktavio Pasın poeziyanı şeirdən ayırdığını dedi: "Poeziya sadəcə sözlərin qafiyələnməsi, hecaya salınması deyil. Poeziya texniki məsələlərdən daha böyük və geniş gerçəklikdir”. O, dünya xalqlarının Sözə olan inamından, Sözün insan təfəkküründə müstəsna yerindən danışaraq, əslində, "cərrahiyyə masası”na yatırılmalı olan” şeirin materialının Dil olduğunu, poeziyada ritm və intonasiyanın önəmini vurğulamaqla, yaradıcı tələbələrə Quranın "Oxu!” nidası ilə başladığını xatırlatdı və onları ardıcıl mütaliə etməyə çağırdı.

"525-ci qəzet”in gənc yazarları Orxan Həsəni və Rəvan Cavidin də qatıldığı tədbirdə "Xəzər”li tələbələrdən Suqra Əliyeva, Nərmin Ələkbərova, Səkinə Ələkbərova, Fəridə Həsənli, Əfsanə Zəkiyeva, Sonabəyim Nağıyeva, Günay Nuriyeva və Sadiq Mirzəyev ilk qələm təcrübələri ilə çıxış etdilər.

Maraqlı məqamları ilə yadda qalan tədbirin sonunda Qismət Rüstəmov tərcümə etdiyi V.Nabokovun "Rus ədəbiyyatından mühazirələr” və tərtibçisi olduğu "Edqar Podan Etqar Keretə qədər” kitablarını "Xəzər”lilərə hədiyyə verdi, fərqli deyim tərzi ilə seçilən şeirlərini oxudu.