Ramiz İsmayıl: Əbülfət Mədətoğlu
Allahın bəndəsi-öz adamıdı,
Şair balasıdır-söz adamıdı,
Dünyanın ən təmiz,düz adamıdı,
Əbülfət Mədətoğlu
Qaçqın adı,Köçkün adı daşıdı,
Varı –Varidatı karandaşıdı,
Haqqın, ədalətin məhək daşıdı,
Əbülfət Mədətoğlu
Yurddan-yurdda köçə-köçə yaşadı,
Daxma-daxma,küçə-küçə yaşadı,
Soruşan olmayıb necə yaşadı,
Əbülfət Mədətoğlu
Gözündə bir dərya nəmi gəzdirib,
Bu qəm dəryasında gəmi üzdürüb,
Dərdə divan tutub,qəmi bezdirib,
Əbülfət Mədətoğlu
Əyilib sınmadı ac qalanda da,
Yolunu azmadı dar dalanda da,
Sevinə bilmədi ev alanda da,
Əbülfət Mədətoğlu
Elin ozan oğlu yurd şairidir,
Bu namərd dünyanın mərd şairidi,
Adı üstündədi:”Dərd şairidi”
Əbülfət Mədətoğlu
Payı,bəxşeyşi ürəkdi dosta,
Şeiri ruzidi ,çörəkdi dosta,
Allahım,ömür ver-gərəkdi dosta,
Əbülfət Mədətoğlu
Şeirim zəifsə məni bağışla,
Özün bər-bəzək vur,özün naxışla
Ramizi tanıdı(n) bircə baxışla,
Əbülfət Mədətoğlu
Ramiz İsmayıl, Xırdalan. ş.