adalet.az header logo
  • Bakı 12°C
  • USD 1.7
28 Noyabr 2018 09:21
15546
ƏDƏBİYYAT
A- A+

Mahir Naziroğlu


Çinli Əli

Çinli Liyonq
şeytana lənətlər yağdırdı
sındırdı içindəki inad adlı bütü.
Dəyişdi dinini
adını dəyişdi

məni "Əli" çağırın
mən Allahın bəndəsiyəm,-dedi.
Ruzisini,
Ata-anasının sağlığını
Allahdan istəyir.
Allahdan diləyir
məmləkətinə dönəcəyi günü.
Qızı Gunanın
Dadlı gülüşünün yumar gözlərini
gecələr...
Həsrətlisi Vanqjia ilə
Şilonmata parkında gəzişdiyi
gecələrin
xəyalıyla yaşayar
çinli Əli.
Zindanda,
axirət gününü gözləyənlərin
həsrəti böyüklükdə olur
qəriblərin həsrəti zindanda.
Çinli Liyonq
Şeytana lənətlər yağdırdı
Sındırdı içindəki inad adlı bütü.
Budur, Allah qəbul etdi
bəndəsinin duasını.
Bu gün öz ölkəsinə dönür
Çinli balası.
Sağ-salamat, qardaşım,
Sağ-salamat.

Şaxta baba

Dərələrdən, təpələrdən
aşıb gələn Şaxta baba
getmə yetimlər evinə
yetimlərin arzusunu
yerinə yetirmək çətin.
Nə alma, nə konfet
nə də narıngi sevindirə bilməz
ağlı kəsən yetimlərin
cocuq ürəklərini.
Dağlardan, dərələrdən
Aşıb gələn şaxta baba
getmə yetimlər evinə
yetimlərin arzusunu
yerinə yetirmək müşkül.
Yetimlərin arzusunda ata-ana
yetimlərin yuxusunda ata-ana.
Gəlişinə ağlayıb
səni də ağladarlar
Şaxta baba.
İsti göz yaşların əridər şaxtanı
əriyərsən,
bəs onda atalı, analı uşaqların
Şaxta babası kim olar?

***
Kimin dərdini çəkəsən?
Kimə qəlbən ağlayasan?
Dost ola, bağrına basıb
Dərdini qucaqlayasan.

Qapımı döyməyən adam
Nə bilsin kiməm, nəçiyəm?
Yediyim dərd, içdiyim qəm,
Mən elə dərdin özüyəm.

Min illərin ovçusuyam,
Hürkdü tələmdən kəkliyim.
Ən ağır yükdü qəlbimdə
Çəkilməz yükdü təkliyim.

Göndər

Əzizim, məktubun
cavabını yaz, göndər.
Şimala doğru əsən
küləklərdən tez göndər.

Şəkilini görəli-
ürəkdən sevdim səni.
Bir az da naz-qəmzəni
Misralara düz, göndər.

Könlü sevən utanmaz,
ötginən avaz-avaz.
Sevgimizə aid yaz,
Üç-beş sətir söz göndər.

Hər görüş cibimdə
uyuyan əlim

Sənə gül uzatsa geri çevirmə,
Tozlu naqillərdən mis soyan əlim.
Bir az gözlərinə kobud görünər
Bir az kəlbətinə oxşayan əlim.

Bir günü qaradır, bir günü ağdır,
Tanrı yazan ömrü yaşayacaqdır.
İsti qayğılardan tamam uzaqdır,
Dizimin üstündə soyuyan əlim.

Bəxtin döyməsidir əlimdəki kir,
Tale vuran döymə əsla silinmir.
Qabar əlcəyindən xəcalət çəkir
Hər görüş cibimdə uyuyan əlim.