Yarpaq olmaq istəmədi-

xiffətdən saralıb,

xəzələ döndü.

...

Bu səhər

bir nəfər

onuncu mərtəbədən yıxıldı yerə.

Yaman sevindim-

zirzəmidə yaşadığıma görə.

...

Balıq bürcündənəm mən-

Tez-tez tora düşürəm.

...

Mürdəşir də adamdır-

balası var onun da,

çörək qazanmalıdır.

...

Ətəyindən yapışdım-

elə bahalıydı ki,

paltarına qıymadı,

əlimi kəsdi zalım!

...

Ömür boyu alışdım,

qızındılar istimə.

Höyüş oldum bircə yol,

deyindilər tüstümə.

...

Bir şeir qoşdum sənə,

sözsüz idi o şeir-

səssiz mahnılar kimi.

...

Bu gün ilhamın

gözü kor oldu,

ölü sözlərə

sinəm gor oldu.

...

Tərpətmək istəyəndə

mən əl-qolumu,

mentalitet o anda

kəsir yolumu.

...

Oxumadın qəlbimi,

sənə nə deyim?-

Köhnə əlifbayladır,

axı ürəyim.

...

Çox başa kül ələnər,

hər saça dən düşməz ki?

...

Məni sevsəydin əgər,

dağılmazdı bu dünya-

sevmədin, biz dağıldıq.

...

Adama oxşayan

saxta adamlar,

abırdan, həyadan

axta adamlar-

yaltaq adamlar!

...

Içini neynirəm mən,

çölünü görmüşəm ki?

...

Bu gün yaman havalıyam-

havam çatmır, boğuluram.

...

Çat verdi ürəyim,

ağrı sızdı içindən.

...

Qarışqa da olaram-

daşımağa dən olsun.

...

Çən-çisəkdi çöldə yenə,

gülüm, çiçəyim nəmlənir.

Qəhərlənib, sənin gözün,

mənim ürəyim nəmlənir.

...

Vay dədə, bu yaş da

əllini keçdi,

mən hələ ömrümü

başlamamışam!