Gözümə işığın düşür.

Yarın-yaraşığın düşür.

Gəl qaçıb gedək dünyadan,

Pasportun var, yaşın düşür,

Qapıya elçi gələndə.

Təriflərlə öyüləndə.

Yaxşı oğlan deyiləndə.

Yada ev və maşın düşür.

Davam edir dava-dalaş.

Bu nə taleh, bu nə savaş.

Tələsmə sən, yavaş-yavaş

Hər gün ölüm aşın bişir.

Allah bizi yıxa-yıxa,

Bəlkə də döyüb öldürür.

Allah bəzi qocaların

qəddini əyib öldürür.

Xoş halına ölənlərin,

Vay halına qalanların

Allah bəzən sevənlərin

Xətrinə dəyib öldürür.

Qılman İmanlıya

Çox da bəxtində küsmə.

Onsuz səndən küsəcəklər.

Bir gün sən lap neyləsən də

Özgəsini seçəcəklər.

çox sevdiyim adamlar.

Gözlərinə qan damacaq.

Çatmayacaq havan da.

Təklik dənizinə atıb

əl edəcəklər limanda,

çox sevdiyin adamlar.

Sonra da uşaq kimi

Arxanca düşəcəklər.

Əllərində boşqab, qaşıq,

kədər yedirdəcəklər.

çox sevdiyin adamlar.

Yıxılanda sıxılacaq

Dizin divar döşünə

Səni dizi bükülü qoyub

Gedəcək iş-gücünə

çox sevdiyin adamlar.

Onda biləcəksən ki,

Aqil başın avammış

Bircə səni sevən elə

əksin olan adammış.

Bəs hara "buxarlandılar",

çox sevdiyin adamlar?!

Çiçəklər öz rənglərinə

inanmırlar -

Solurlar...

***

Allah bizə ömür

verir,

insanlarsa vaxtımızı alır.

***

Qar üzərində yeriyirəm

ancaq

sol ayağımın izləri qalır.

***

Şəkil çəkdiririk nağıla dönür:

Biri var idi, biri yox.

***

Ezop zəncirini açmağa qorxur,

Bilir ki, itləri bağlayacağıq.

***

Müharibə:

Əsgər ağzında evlərindəki

çörəyin xəyalını çeynəyir.

***

Vaxt ötdükcə,

sənin günahlarını unudub

öz günahlarımı xatırlayıram.

***

Nitq hissələri:

Sifətlərlə sevirik,

fellərlə ayrılırıq.

***

Bəlkə də səadət

mən gəlməmişdən öncə

evdə işıqların yanmasıdı ancaq...

***

Səni hər görəndə

qabırğalarımı sayıram

əskik gəlir.

***

Heç nə unudulmur bu yer üzündə -

Hər şey öz adıyla əzaba dönür.

Fikir yorğununun dedikləri

Kilsələrin üstündəki xaçlar

bənzəyir dinə sancılmış qılınca.

Qürbətdə yada düşən dərdlərim

könlümü incidir, bağrımı sökür -

Bakı vaxtıyla - öz saatımızla...

Bu döyüş meydanı dünyada

"İbadət edən silahlar"ın səsindən

tutulub, kardır qulaqlarımız.

Burda kilsə zəngiylə döyülür yerə,

əcələ tələsən "əsgər ayaqları"mız...

İnsafdırmı, görəsən,

faniliyinin haqqını əbədiyyətlə ödəyirik -

cənnətlə, cəhənnəmlə,

əbədi zülmlə, əbədi xoşbəxtliklə.

Ayaq üstə yaşamaqdır

sonuncu qələbəmiz -

bizi torpağa çəkən dünyada - çəliklə.

***

Ata,

Vaxtın zəncirindən asılıb yoxluğun,

o zəncirdən asılıb yüyrüyüm...

Yüyrükdən enəndə,

ayağım yer tutanda

görməyəcəyəm səni?

Ata,

təklədilər məni,

söykəyib kürəyimi

anamın təsəllisinə

vuruşdum:

"Allah da təkdi, oğlum".

Ata,

Qorudum özümü,

Ailəmizin ümid yeri

olduğumu bilən gündən.

Bayramlarda

sənin ağzınla öpürəm

anamın üzündən...

***

Ölüm deyil bir qadının yoxluğu.

Ən uzağı soyuq yemək deməkdi.

Ən ötəsi həvəssizcə əyninə,

Təzə, amma qırış köynək geyməkdi.

Nə var onsuz yaşamağa, asandı.

Cüt yataqda tək yatmaqdı "rahatca".

Eh-vay onla dil tapmaq da çətindi,

neyləyirsən, danışammır həyatca.

Ondan, onsuz, nə qalacaq? Ötəsi...

bir cütlənmiş çəkməsi var burada.

Onu da ki, gizləyərəm uzağı.

O əldəyməz, kimsəsiz yan odada.

Kitabları dağıdaram özümçün,

yaddan çıxıb yanar xörək sobada.

Unudaram qalın paltar geyməyi:

Rahat-rahat üşüyərəm havada.

Deməz: "Evdə çəkmə bu zəhrimarı,

Siqaretim qabındaca öskürməz.

"Sevgi" sözü hər davada min dəfə,

çiliklənib, yerə-yurda tökülməz.

Gedən getsin, qapım Novruz qapısı -

gedənə də, gələnə də açıqdı.

Bir cüt gözdü onu burda gözləyən.

Onsuz axı yatmaq olar? - Ayıbdı.

Sevmədiyin qadınla bir damın

altında yaşamaq

nə onu aldatmaqdı,

nə də özünü.

sevmədiyin qadınla bir damın

altında yaşamaq

sevgidə zibillik kimi

eşələnməkdi.

yemirsən, amma nəsə

axtarırsan orda

Sevmədiyin qadınla bir damın

altında yaşayırsansa,

deməli, taleyindən

Həmzə Qır atı qaçırıb.

Sevmədiyin qadınla bir damın

altında yaşayırsansa,

axşamlar evinin qapısı tabut

ağzı tək açırsan.

Və hələ talehin tərs üzü kimi

uşaqlarda varsa,

Deməli, içindəki bütün

sevincləri yağmalayıblar.

Sevmədiyin qadınla yaşadığı

evə gəlmir kişi,

Öyrəşdiyi dərdlərin tüstüsünə

gəlir hər axşam

Sevmədiyin qadınının açdığı

süfrədə limonadlar da

şərab kimidi.

Kişi öz bədbəxtliyindən

sərxoş olur.

Sevmədiyin qadınla bir

damın altında yaşamaq

püşkünə düşübsə,

Evdə uşaqlar,

Həyətdə ağaclar.

Güldanda güllər də

Gec böyüyər.

Sevmədiyin qadınla bir damın

altında yaşayırsansa.

Rus bazarlarındakı saxta çeçen

dolları kimi olarsan

əldən-ələ, dildən-dilə

düşə-düşə xərclənərsən.

Sevmədiyin qadınla bir damın

altında yaşayırsansa

Sənə yenidən doğulmaqdan

özgə carə görmürəm.