Azərbaycanda kasetli silahların istehsalı, ehtiyatının toplanması, ölkə ərazisindən daşınması və istifadəsi faktı qeydə alınmayıb.

Trend-in məlumatına görə, bu barədə "Minalar Əleyhinə Azərbaycan Kampaniyası” İctimai Birliyinin yaydığı hesabatda deyilir.

Hesabatda qeyd olunur ki, Azərbaycan ərazilərində kasetli silahlarla baglı problem Ermənistanın başladıgı müharibənin nəticəsidir: "Kecmiş Dağlıq Qarabağ Muxtar Vilayətində və onun ətrafındakı yeddi rayonda aktiv döyüş əməliyyatları gedib. Bundan başqa keçmiş poliqonlar, partladılmış sursat anbarları, ərazilərə səpələnmiş sursatlar bu gün Azərbaycan üçün ciddi problemlər yaradır. Beynəlxalq təcrübə, xüsusən də Balkan yarımadasındakı təcrübə göstərir ki, belə ərazilərin təqribən 4-6%-i mina və partlamamış hərbi sursatlarla çirklənmiş hesab olunur".

Qeyd edilir ki, Azərbaycanın kasetli silahların qadağan olunmasına dair Konvensiyaya ərazisinin bir hissəsi başqa ölkənin silahlı qüvvələri tərəfindən işğal olunduğu üçün qoşula bilmir. Digər tərəfdən bu gün qonşu dövlətlərdən hec biri, o cümlədən də Ermənistan bu konvensiyaya qoşulmayıb. Konvensiyaya qoşulan dövlətlər kasetli silahların istehsalı, daşınması, yayılması və tətbiq edilməsinin qadağan olunması üzrə öhdəliklər götürür. Azərbaycan bu Konvensiyanın müddəalarını qəbul edir. Azərbaycan konvensiyanın tələblərinin həyata keçirilməsi istiqamətində mühüm addımlar atır. Milli potensial yaradılıb, bir neçə regionda minatəmizləmə əməliyyatları aparılır.

Məlumat üçün bildirək ki, "Minalar Əleyhinə Azərbaycan Kampaniyası” İctimai Birliyi Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə "Cəbhəyanı rayonlarda yaşayan mina qurbanlarının və digər müharibə əlillərinin kiçik biznesə cəlb edilməsi” adlı layihənin icrasına uğurla yekunlaşdırır.

Bu layihənin məqsədi cəbhəyanı rayonlarda yaşayan mina qurbanlarını və müharibə nəticəsində əlil olmuş şəxsləri kiçik biznesə cəlb etməklə onların iqtisadi inteqrasiyasına nail olmaq, hazırkı iqtisadi vəziyyətlərinin yaxşılaşdırılması yolu ilə sosial problemlərinin həll olunmasına, özlərinin və ailə üzvlərinin ləyaqətlə yaşamasına kömək etməkdən ibarətdir.

Qrant layihəsi Füzuli, Tərtər, Goranboy, Qazax, Gədəbəy, Daşkəsən, Göygöl və Şəmkir rayonlarında həyata keçirilib.

Ümumilikdə layihənin həyata keçirildiyi rayonlardakı seminarlarda 319 nəfər mina qurbanı, müharibə əlili və ailələrində müharibə əlili olan insan iştirak edib.

Layihənin büdcəsi 6 min manatdır.