Bütün bunların qarşısını almaq üçün Yol Patrul Xidməti Alayının bütün tağımlarında anomal hava şəraitində gücləndirilmiş iş rejimində işləyirlər. Bu da onunla bağlıdır ki, hava şəraitinin həddindən artıq isti keçdiyi ərəfədə ağır qəzalar baş verməsin və onun qarşısı qabaqlayıcı tədbirlər nəticəsində alınsın. Bu barədə Yol Patrul Xidməti Alayının komandiri, polis polkovniki Balakişi Əhmədov bütün tağım komandirlərini xəbərdarlıq edib və öz tövsiyyələrini, tapşırıqlarını verib. Aydındır ki, hər bir vəzifə məsuliyyətlə yerinə yetiriləndə istər-istəməz onun müsbət nəticələri öz bəhrəsini verir.

Ələt-Astara-İran sərhədi avtomobil yolunda Yol Patrul Xidməti Alayının 10-cu tağımının əməkdaşları xidmət aparırlar. Onlar bu yolun 0-cı kilometrindən 116,6-cı kilometrinə qədər hərəkətin təhlükəsizliyinin təmin edilməsi istiqamətində lazımi tədbirlər həyata keçirirlər. Əlbəttə, hər bir tədbirin keçirilməsi öncə ona xidmət edir ki, yol hərəkəti qaydalar sürücülər tərəfindən pozulmasın. Xüsusən də kobud qayda pozuntularına yol verilərkən bunun nəticələri və faciələri daha ağır olur.

Havaların isti keçdiyi günlərdə demək olar ki, 10-cu tağımın əməkdaşları öz vəzifə borclarını çox vicdanla, namusla, peşəkarcasına icra edirlər. Belə ki, sutkanın gündüz saatında havalar həddindən artıq isti olarkən onlar stasionar postda sərnişin daşıyan avtobus və mikroavtobus sürücülərini saxlayaraq maarifləndirmə işləri aparır, onlara izah edirlər ki, bu cür havada daha diqqətli olsunlar, yorulduqları halda postda təşkil edilmiş bulaqda əl-üzlərini soyuq suyla yusunlar. Təbii ki, bu cür profilaktik tədbirlər nəticəsində isti havada baş verə biləcək qəzanın qarşısı xeyli alınmış olur.

Biz də reyddə iştirak edərkən onun şahidi olduq ki, çoxlu sayda sürücü 10-cu tağımın stasionar postunda avtomobilləri saxlayaraq bulaqda soyuq suyla əl-üzlərini yuyur, bir qədər dincəlir və bundan sonra sükan arxasında əyləşirlər. Polis əməkdaşlarından Elvin Novruzov, Babək Zeynalov, Fərid Abbaslı, Emil Orucəliyev, Elşad Həsənov müxtəlif markalı minik maşınının sahiblərini də stasionar postda saxlayaraq bu cür isti havada ehtiyatlı olmalarını tövsiyyə edirdilər. Məsələn, «KİA» 90 DZ 082, «Mersedes» 99 XE 889, xarici markalı 90 CN 707 markalı avtomobilin sürücüləri postda saxlanılarkən təbii ki, bundan çoxları razı qaldı. Adətən sürücülər postda saxlanılarkən əsəbləşir və yol polisinə etirazını bildirirlər. Amma bu dəfə onlar yol polisinin maarifləndirici söhbətindən və izahat işlərindən razı qaldılar və onlara öz təşəkkürlərini bildirdilər. Ümumiyyətlə, adını çəkdiyimiz yol polisi əməkdaşları yüksək iş əmsalına malik olmaqla yanaşı, sürücülər və hərəkət iştirakçıları ilə çox mədəni və nəzakətlə davranırlar.

Vətəndaş-polis münasibətlərinin sivil qaydada qurulması istər-istəməz ictimai asayişin qorunmasında və hərəkətin təhlükəsizliyinin təmin edilməsində çox önəmli əhəmiyyət kəsb edir. Çünki bu münasibətlər nə qədər səmimi qurularsa, nə qədər isti olarsa bundan hər iki tərəf razı qalar.

10-cu tağımın komandiri, polis mayoru Qulu Quliyev görülmüş tədbirlə bağlı bizimlə söhbətində bildirdi ki, havaların isti keçdiyi günlərdə rəhbərliyin onlar qarşısında qoyduğu bütün vəzifələr peşəkarcasına, yüksək səviyyədə yerinə yetirilir. Birmənalı olaraq deyə bilərəm ki, bizim xidmət etdiyimiz ərazidə havalar daha da isti keçir. Bəzən elə olur ki, günorta saatlarında temperatur +44-45 dərəcəyə çatır. Belə bir anomal hava şəraitində əməkdaşlarımız bir an da olsun sayıqlıqlarını itirmirlər. Üstəlik də sərnişin daşıyan avtobus və mikroavtobus sürücülərinə qarşı mübarizə daha da gücləndirilib. Elə sürücü var ki, 16 saat istirahət etmədən sükan arxasında əyləşir. Biz bu cür sürücüləri stasionar postda saxladırıq, onlarla söhbət edirik, izahat işləri aparırıq. Və bundan sonra onlar postdakı bulaqda əl-üzlərini yuyub, bir qədər dincələndən sonra sükan arxasında əyləşərək yollarına davam edirlər. Məhz bu cür qabaqlayıcı tədbirlərin nəticəsidir ki, xidmət apardığımız avtomobil yolunda isti havalarda ölümlə nəticələnən ağır qəzalar baş vermir.

Yol Patrul Xidməti Alayının 10-cu tağımının əməkdaşları bu ilin 6 ayı ərzində yol hərəkəti qaydasını pozan 3293 sürücü barəsində protokol tərtib edib. Bu isə o deməkdir ki, qanunu pozmuş çoxlu sayda sürücülər intizam məsuliyyətinə dəvət ediliblər və onları gözləyən təhlükədən xilas olublar.

Havalar nə qədər isti keçsə də mürəkkəb anomal şəraitdə xidmət edən 10-cu tağımın əməkdaşları hərəkətin təhlükəsizliyini tənzimləyir, sürücülərə ehtiyatlı olmağı tövsiyyə edir və mənzil başına kondinsionersiz avtomobillərlə getməməyi məsləhət bilirlər. Bax, bunun özü isə o deməkdir ki, anomal istilərdə hər bir sürücü həm özü, həm də apardığı sərnişinin taleyi haqqında ciddi düşünməlidir ki, onları qarşıda ağır qəzalar gözləməsin.