100 yaşlı polisimizin qadın əməkdaşları...
Bu gün 100 illiyi qeyd olunan Azərbaycan Respublikasının daxili işlər orqanlarında 3300-dən çox qadın əməkdaş xidmət edir.
İ.Babayevin sözlərinə görə, ümumilikdə 22 xanım əməkdaşa etimad göstərilərək, rəhbər vəzifələrə irəli çəkilib ki, bu da şəxsi heyətin 8,4 faizini təşkil edir:
Qadınların hüquq və azadlıqlarının təminatına dair milli qanunvericilik aktlarından və beynəlxalq sənədlərdən irəli gələn tələblərin icrası Daxili İşlər Nazirliyinin daim diqqət mərkəzində saxladığı məsələlərdəndir. Rəhbərlik tərəfindən gender siyasəti sahəsində məqsədyönlü və sistemli tədbirlər həyata keçirilir.
İstefada olan polis polkovniki Zivər Xəlilova daxili işlər orqanlarında xidmət etdiyi 33 il ərzində cinayətkarlıqla mübarizədə əlindən gələni əsgərməyib, uzun illər Baş Cinayət Axtarışı İdarəsində səmərəli fəaliyyət göstərib, idarə rəisinin müavini vəzifəsinə qədər yüksəlib, gənc əməliyyat müvəkkillərinin peşəyönümlü biliklərinin artırılmasında böyük xidmətləri olub, əməyi ölkə və DİN rəhbərliyi tərəfindən yüksək dəyərləndirilib, "Azərbaycan bayrağı” ordeni, digər yüksək mükafatlarla təltif olunub.
Baş Kadrlar İdarəsinin Komplektləşdirmə İdarəsinin rəisi, polis polkovniki Yeganə Məmmədova üçün az qala bayram günlərində də səhər açılandan axşama qədər işləyib, çalışmaq adi haldır. Ona olan etimadı layiqincə doğruldan Yeganə Məmmədovanın çoxsaylı mükafatları arasında ölkə rəhbərinin sərəncamı ilə təltif olunduğu "İgidliyə görə” medalı xüsusilə dəyərlidir.
Tibb İdarəsinin hər iki poliklinikasına tibb xidməti polkovnik-leytenantı Səadət Həsənova və tibb xidməti mayoru Aysel Muxtarova rəhbərlik edir. Elə kollektivin əksər üzvləri də xanımlardan ibarətdir.”.
İ.Babayevin sözlərinə görə, xalq artisti Fidan Hacıyeva opera sənətinin tanınmış simalarından biri kimi mədəniyyətimizi dünyanın ən ünlü səhnələrində layiqincə təmsil edir:
"Fidan xanım DİN-in Daxili Qoşunlarının Nümunəvi-göstərici Hərbi Orkestrinin hərbi dirijoru-mahnı ansamblı rəisinin müavini, baş leytenantdır.
Müstəqillik illərində ölkəmizə ilk Olimpiya qızılını stend atıcısı Zemfira Meftahətdinova qazandırıb. Dəfələrlə dünya və Avropa çempionu və rekordçusu olan polis polkovniki Zenfira Meftahətdinova DİN İdman Cəmiyyətinin sədridir.
Rəhbərlik etdiyi qurumun bütün imkanlarını daxili işlər orqanları əməkdaşlarının fiziki hazırlıqlarının möhkəmlənməsi, idmançılarımızın ustalığının artırılmasına yönəldib. Nəticə göz qabağındadır: 2017-ci ilin yekunlarına əsasən, ölkənin ən yaxşı idman təşkilatı seçilib. Yüksək təşkilatçılığın nəticəsidir ki, ötən il daxili işlər orqanlarında xidmət edən 150-yə yaxın əməkdaş ölkə və beynəlxalq miqyaslı yarışlarda 43 medal qazanıb. Onlardan 32-si ölkənin milli komandalarının tərkibində beynəlxalq arenalarda, Avropa və Dünya çempionatlarında əldə olunub. Ümumilikdə, bu dövrdə DİN-in İdman Cəmiyyətinin təmsilçiləri tərəfindən ölkə və beynəlxalq miqyaslı yarışlarda qazanılan 231 medaldan 73-ü qızıl, 65-i gümüş, 93-ü bürüncdür. 64 medal yeniyetmələrin, 47 medal gənclərin, 120 medal isə böyüklərin payına düşür. Medallardan 96-si beynəlxalq miqyaslı, 135-i isə respublika birincilik və çempionatlarında qazanılıb. İdmanımızın inkişafındakı xidmətlərinə görə ölkəmizin ən titullu idmançılarının siyahısına başçılıq edən Zenfira Meftahətdinova "Şöhrət” ordeni, "Tərəqqi” medalı və digər yüksək mükafatlara layiq görülüb. Səbail Rayon Polis İdarəsində xidmət edən qızı - polis serjantı Regina Meftahətdinova anasının yolunu həm xidmətdə, həm də idmanda layiqincə davam etdirir.
Digər olimpiyaçımız, istefada olan mayor İradə Aşumova uzun illər Daxili Qoşunlarda xidmət edib, güllə atıcılığı üzrə dünya və Avropa çempionu olub, Afina Olimpiadasının bürünc medalını qazanıb. Həm xidmətdə, həm idmanda onun yolunu oğlu - Daxili Qoşunların idman komandasının zabiti, baş leytenant Ruslan Lunyov davam etdirir.
Dövlət başçısının sərəncamı ilə "İgidliyə görə” medalı ilə təltif olunmuş Səbail Rayon Mühafizə İdarəsinin əməkdaşı, polis baş serjantı Leyla Həsənova güllə atıcılığı üzrə qatıldığı yarışlarda yüksək mükafatlar qazanıb. Əlahiddə Çevik Polis Alayının polis nəfəri Nuriyyə Axundova hələ gənc olmasına baxmayaraq, cüdo güləşi üzrə dəfələrlə respublika çempionatının, beynəlxalq yarışların qalibi olub. Baş Dövlət Yol Polisi İdarəsinin şöbə rəisi, polis polkovnik-leytenantı Fəqanə Kərimova dəfələrlə DİN çempionu olub. Sabunçu RPİ Kadrlar qrupunun inspektoru, polis leytenantı Ədilə Qurbanova xidmət bir tərəfə, belə desək, idmanda da ağır növləri seçib. Karate üzrə ikiqat dünya, doqquzqat ölkə çempionu olmaqla yanaşı, həm də pauerliftinq üzrə qatıldığı respublika və beynəlxalq miqyaslı yarışlarda yüksək nəticələr əldə edib”.
"Nizami Rayon Polis İdarəsi Post-Patrul Xidmətinin polis nəfəri, polis serjantı Aygün Səmədovanın qarşılaşdığı hadisəni nümunə göstərə bilərik. Bir axşam işdən gec çıxıb evlərin arası ilə metroya gedərkən iri cüssəli oğlanın yaşlı bir qadının çantasını alıb sürətlə uzaqlaşdığını görüb. Tez onun arxasınca qaçan Aygün xanım oğlanı yaxalayıb, Polis Bölməsinə təhvil verib. Qadının içində pulu, bank kartları olan çantası özünə qaytarılıb”.