Tahir Rza : Ah, bu necə zamandır?
Tahir Rza
Ah, bu necə zamandır?
Bu dünyaya baxanda
Qanım yaman qaralır.
Ellər viranə qalıb,
Bağ-bağçalar saralır.
Ədalət dərdə düşüb,
Haqqın yolu daralır.
Vədlər saxta, söz əməl
Şər-böhtandır, yalandır,
Ah, bu necə zamandır?
Kişilər atsız qalıb,
Nadanlar minib atı.
Zülmətə çeviriblər
Qanmazlar bu həyatı.
Bilinmir heç çoxunun
Nəsli- kökü. soy adi,
Dünya yaman dəyişib,
Hər tərəf ah-amandır
Ah, bu necə zamandır?
Ədalət boynu bükük
Arzular pərən-pərən.
Bilinmir kimdi qatil,
Kimdir ölən, öldürən.
Hakimləri pul yıgan,
Vəkilləri iş verən.
İnsanlıq qan aglayır.
Yolumuz qar-borandır
Ah, bu necə zamandır?
Nədən haqq bazarında
Yag çevrilib, şor olur?
Qarabag deyiləndə
Görən gözlər kor olur?
Niyə düz sözümüzdən
Çoxları dilxor olur?
Bu dünyanın sabahı
Aydınlıq yox, dumandır.
Ah, bu necə zamandır?
Ədalət bir tərəfdə
İnləyir qolu bağlı.
İnsaf, abır tükənir,
Qanunun yo
lu bağlı.
Var-dövlət zəncirinə,
Agası, qulu bağlı.
Bəşər tamah dişini
Çəkməsə dərd yamandır.
Ah, bu necə zamandır?
Xəyanət etməsəm də
Xəyanətə tuşam mən.
Öz yurdumdan qaçqınam,
Köçgün vətəndaşam mən.
Haqq səsimi eşitmir
Yoxsa qara daşam mən?
Yurdu yanan, dağılan
Milyon-milyon insandır
Ah, bu necə zamandır?
Ürəyimin dərdləri
Çox ürəkdə dövr edir.
Suda, qanda,havada
Duz-çörəkdə dövr edir.
Ağacları yandırır
Gül-çiçəkdə dövr edir.
Tək insan can deyildir
Ağac da, gül də candır.
Ah, bu necə zamandır?
Torpağım parçalanıb,
Qəlbi para olmuşam.
Əsirdir od-ocağım
Günü qara olmuşam.
Sinəsi qan içində
Bağri yara olmuşam.
Dünya nə hala qalan,
Nə də ki, dərd duyandır
Ah, bu necə zamandır?
İmanıma,dinimə
Gülən nadan, darıxma!
Əsir qalar sənin də
Bacın, anan darıxma!
Başına oyun açar
Bir vaxt dövran darıxma!
Anlayarsan ki, tarix
Ən böyük haqq-divandır,
Ah, bu necə zamandır?
Torpaqlar qan içində
Körpələr güllələnir,
İnsanların başına
Göydən alov ələnir.
Nə hakim dada çatır,
Nə də vicdan dillənir.
Sözdə, vəddə, yalanda
Hərə bir qəhrəmandır,
Ah, bu necə zamandır?
Dağılan tifaqların
Hesabı yox, sayı yox.
Milyonların insan tək
Yaşamaq haqq-sayı yox.
Evi, yurdu, torpagı
Çörəyi yox, çayı yox.
Gözlər yollarda qalıb,
Ürəklər nigarandır.
Ah, bu necə zamandır?
Ədalətsiz dünyada
İnsanlıq ola bilməz
Körpə xəstə bədəndən
Saglam dogula bilməz.
Bu dərd, zillət, məşəqqət
Cavabsız qala bilməz.
Allahsızlar çoxalıb
Gedən dindir imandır,
Ah, bu necə zamandır?
Uşaq dərdi bilərmi
Övladı olmayanlar?
Şərəf, mənlik düşünməz
Öz adı olmayanlar.
Tərbiyədə böyüyü,
Ustadı olmayanlar,
İnsan çağrılsalar da
Əslində cin, şeytandır,
Ah, bu necə zamandır?
Tarixi qarşına qoy,
Dünənini varaqla.
Taleyinə nəzər sal,
Kimliyini soraqla.
Qalib ola bilməzsən.
Heç vaxt silah-yaraqla,
Ey insan, kamalının
Çırağını gəl yandır!
Ah, bu necə zamandır?
İnsan hüquqlarından
Danışan çox, yazan çox.
Həqiqəti çevirib
Min bir yana yozan çox,
Yazdığını bir anda,
Tapşırıqla pozan çox.
Siyasətdə naşıdır,
Onlar yazıb-pozandır.
Ah, bu necə zamandır?
Sözlərdə baxışlarda
Azadlıq havası var.
Əfsus ki, bu havada
Bir məslək davası var.
Siyasət meydanında
Şeytanın yuvası var.
Əməldə yox, avazda
Hərə bir pəhləvandır.
Ah, bu necə zamandır?
Yoxdur coşub-çaglayan
Bəlaları düşünən.
Milyonlarla kimsəsiz
Balaları düşünən.
Dagılan şəhərləri,
Qalaları düşünən
Varsa çıxsın irəli,
Gözlənilən bir andır
Ah, bu necə zamandır?
Böyüklər öz hökmüylə
Fəxr eləyir öyünür.
Kiçiklər təlaşdadır
Dərd içində deyinir.
Biri bayram eləyir,
Biri qara geyinir.
Güclülər gücsüzlərin
Dərisini soyandır.
Ah, bu necə zamandır?
Demokratiya adından
Şeytan gəzir dünyanı.
Yeməyə sıralayır,
Səmtə düzür dünyanı.
Ölkələrə dərs keçir
Basıb əzir dünyanı.
Bilinmir ki, bu necə
Əcaib bir heyvandır
Ah, bu necə zamandır?
Agıl olmayan yerdə
Zor işləyər deyiblər.
İnsan bir-birin qırar,
Didib-yeyər deyiblər.
Haqsız haqlını bağlar,
Düzü əyər deyiblər.
Agılsızın məshəbi
Mal-pul, şöhrətdir, şandır
Ah, bu necə zamandır?
İdrak, ağıl sahibi
Cahana belə baxmaz.
İnsanlığı dərk edən
İnsana belə baxmaz.
Dini olan məsləkə,
İmana belə baxmaz,
Haqqa tutar üzünü
Haqq İncildir, Qurandır
Ah, bu necə zamandır?
Andıma sadiqəm mən,
Öz haqqımı ver mənə.
Vicdan, iman, azadlıq
Söz haqqımı ver mənə.
Tanrımın buyurduğu
Düz haqqımı ver mənə.
Haqlıları sev, yaşat
Haqsıza haqqı qandır!
Ah, bu necə zamandır?
Dinsizə, imansıza,
Aman vermə bir anda.
Sərras vur, sürətli vur
Gözlərindən vuranda.
Dolanır düşmənlər bil
Hər tərəfdə, hər yanda.
O, nə haqqa gələndi,
Nə də qandan doyandır.
Ah, bu necə zamandır?
Zülmə meydan vermə gəl
Ədalətə yollar aç.
Dostluğa, qardaşlığa,
Sədaqətə yollar aç.
Sevməyə, sevilməyə,
Məhəbbətə yollar aç.
Sabahını düşün bir
Qan-qadanı dayandır.
Ah, bu necə zamandır?
Anla zülmü-zilləti
Əldə qanun tutanlar,
İnsan donundan çıxıb
Tanrıya ox atanlar,
Haqqı-sayı unudub,
Məqsədinə çatanlar,
Bir anda xar olurlar.
Çox çətin imtahandır
Ah, bu necə zamandır?
İnsan, getmə bu yolu
Yaman tora düşərsən.
Baglanar yolun-izin
Boran-qara düşərsən.
Zülm etmə, zülmə gəlib,
Bir vaxt dara düşərsən
Tutdugun yol haqsızlıq,
Şərdir, ölümdür, qandır.
Ah, bu necə zamandır?
Bəşər sənə güvənir
Sən niyə bəs susursan?
Hamı Allahım deyir
Gəlmir bir səs, susursan?
Dünya dərd içindədir
Nahaq, əbəs susursan.
Göstər haqq divanını
Vicdanları oyandır
Ah, bu necə zamandır?
Göyləri lərzə salan,
Nifrətin nidasıdır.
Yerlərə hökm oxuyan
İnsanlıq vidasıdır.
Bizi haqqa səsləyən
Tanrının sədasıdır.
Etdiyimiz əməldən
Barı bizi utandır.
Ah, bu necə zamandır?
Haqq deyib, haqqı satan
Rəhbərlərə sözüm var.
Sizin üçün oyuncaq
Yaranıbmı insanlar?
Birinə dərd verirsiz,
Birinə kül-ixtiyar.
Hər yanda zülm-zillətlə
Çarpışan müsalmandır
Ah, bu necə zamandır?
Sinəmizdə Xocalı,
Qaradağlı dağı var,
Xalqımın qan ağlayan,
Əsir Qarabağı var.
Nə qədər ki, dünyada
Erməni tək yağı var
İnsanlar inləyəcək,
Bu ki, aşkar, əyandır
Ah, bu necə zamandır?
Bilin, günahsız qanlar,
Zülmə sipər olacaq.
Zalımı susdurmağa
Qəlbdə təpər olacaq.
Dünya bir ağ xalatlı
Yüyrək kəhər olacaq.
Tanrı zülmün başına
İldırım tək çaxacaq,
Haqq ağ günə çıxacaq!
Haqq ağ günə çıxacaq!