Yorğan üzündə külək

küləkdə yorğan üzü.

Bu küləyi zivədən

asıb qonşunun qızı.

Yorğan üzündə qalır

küləyin cizgiləri.

külək yorğan üzündə

Səhərdən güzgülənir.

Zivədə külək yellənir

Küləyi külək yellədir.

...mış, ...muş... kimiyəm

Həyatın adlıq halında

Keçmiş zamanındayam

Yır-yığış fəslidi,canım,

Sən nəyin hayındasan

Mən nəyin hayındayam.

...acaq-lar,...əcək-lər qaldı arxada

Hallanıb qurtaran bir hal kimiyəm

Elə haldayam ki,halım bilinməz

Elə məkandayam,

Yolum bilinməz

Görmürsənmi, elə özüm yol kimiyəm?

Sevilib unudulmamış

Qoxlanıb atılmamış

Boğazacan günahda

Heç günaha batmamış

Alınıb satılmamış

...kimiyəm.

Bütün bunlar olmamış-

Planetlər budağında uçmamış

Aramızda zaman aşımı var

Dərsdən qaçar kimi

Zamanın tunelindən

o üzünə qaçmamış

Min kərə doğulub-olməmiş

...kimiyəm.

Yanılıb gəldiyim Yerə

Seçilib göndərilməmiş

Uşaq paltarını kəfəntək

Kəfəni uşaq paltarı kimi geyməmiş

Ömrü boyu kəfənləri

Cıra-cıra gəzməmiş

...kimiyəm.

Doğulmamış kimi

Ölməmiş kimiyəm.

Karvan qatara qoşulmuş

Qatar karvan səfinə

Ikisi də uçub qoşulmuş

Durna qatarına

Özgə planetə daşınmış

-kimiyəm.

Sən məndə yaşamadın

Mən səndə yaşanmış

...kimiyəm.

Ömründə yaz olmamış

Öz=özündə azmamış

Heç bu şeiri də

Yazmamış

...kimiyəm.

Ömrün bahar arzusu

Piano dilləri-otlar çalınır

Yağış barmağında yaz buludunun

Qoşulmaq istəyir sübh quşlarına

Adam olduğunu adam unudub

günəşdən asılıb Yer yelləncəyim

Bu yaz oxudacaq ahıl dağları.

Sinəmdə saxlaya bilməyəcəyəm

Dartınır urəyim bahara sarı.

Çırtdayıb gözündən gülər bulaqlar

Oyuncaq uşaqdı,uşaq oyuncaq

Durna slrasına dönən misralar

Yaşıl qəzetlərdə çap olunacaq

Hamilə qəbrin də üzü güləcək

Çiçək açılırtək söküləcək dan

Bilmirəm sevincdə nə eləyəcək

Yazı torpaq kimi gözləyən atam.

Bayram tonqalıyam,arzu-ocağam

Ömrümün axarı-baxarı gəlib.

Burdan kəndimizə qışqıracağam

-Hey,hey!..Kəramətin baharı gəlib

Göyərər təmirə dayanan gəmi

Qatar yaz daşıyar kənddən şəhərə.

Qızları yeriyən çiçək sanarlar

baxışlar qonarlar gül küçələrə.

Piano dilləri-otlar çalınır

Yağış barmağında yaz buludunun

Qoşulmaq istəyir sübh quşlarına

Adam olduğunu adam unudub.

Gəlin paltarın qalıb

Bir qucaq qar kimisən

əriyirsən,hopursan

hopursan ömür-günümə.

Uşaqlar həyətdə

Qar qız heykəli qurub

mən-saqqallı uşaq

Qar qız oğrusu

Bir qucaqda bir pişik

bayılıb sığalın səadətindən

Mən də dizlərimi qucaqlamışam.

Gəlin paltarın qalıb

qollarım arasında

yolların harasında?

sürüşüb düşmüsən

qollarım arasından

illərin harasında?

hər qış saqqallı uşaq

gözləyir ki,qar yağa

O da Qar qız düzəldə

ala qolları arasına.

Hər qış qar yağmasa da

Qosqoca kişi

Qar qızla şəkil

çəkdirir

İKİ STUL

İki stul üz-üzə

Güldan boşdu stolda

əsir küləyin səsi

otaqda asta-asta.

Indi hava soyuqdu

Yağsa,damacaq tavan

Çay dəmlədim,soyudu

Qışqırdı maqnitofon.

Iki stuldu həmən

baxılmadı alboma

bir udum su olardın

səhralanan qəlbimə

Iki stuldu həmən

Nə hacət artıq sözə.

Birində sən,birində mən

oturmalıydıq üz-üzə

***

Hərdən-birdən

istəyirəm yoxluğuna zəng edim

yoxluğunun qulağını dəng edim

Evinizin telefonu

gəlin köçüb səninlə.

Telefonun o başından səs gələr

səs gələr ki,

ərə gedib,başa düş,

O qız indi ərə gedib,

bilməm hansı gora gedib.

Açılmadan solanım

Həm doğrum,həm yalanım

Özün yoxsan,

Heç olmasa,

Yoxluğuna zəng edim.

Sözü dildə

Gözü yolda qalanım.

Hərdən-birdən istəyirəm

yoxluğuna zəng edim

yoxluğunun qulağını dəng edim.

-...dud,dud,dud...

QAR ÇİÇƏKLƏRİ

Çiçəyə gül almaq ağlıma gəlməz

Gətirdim Yer boyda qar çiçəkləri.

Sırsıra-evlərin boyunbağısı

Durub qar altında...Yar çiçəkləyib.

De,harda qalmısan? Gəlib çıxsana..!

Xaraba ömrümü bir də yıxsana.

Qaraya ağ düşüb,gözüm, baxsana

Ağ saça qar düşüb, qar çiçəkləyib.

Həyat öylə ağır,ölüm vız gəlir

Yaza qış düşübdü, qışa yaz gəlir.

Böhtanda batmışam, sənə söz gəlir

Söz də gülümsəmir,zor çiçəkləyir.

BİR-ləşin,

bütün ölkələrin istedadsızları-

həşəratları,

Qarşınızda dayanıb

Ordu kimi Tək adam,

tək adam-ordu kimi.

Hamı BAZAR-lıq oldu

burada nə gəzirsən?

bir adamlıq yolun yox.

Əlini əllər apardı

Əl tutmağa əlin yox.

Çabalasan,batarsan

bataqlıqda yolun yox.

Yola qapı qoymazlar

qapı qoymazlar yola,

Ay müsəlman,ay insan

Göyə qapı qoymazlar

Sozə də, sevdaya da.

Üzündən görünür ki

döyüşməkdən yorulmuş...

Meydanda tək qalmısan

Ay qoşunu qırılmış.

-Bu kimdir ki,əyilməz

-Bu kimdir ki,satılmaz

və alınmaz?...

qapı döyməz qanı axan səsi

Meydanda tək qalmısan

Təklənən qoşun sərkərdəsi.

Birləşin,şanlı ölkələrin şərəfsizləri

qarşınızda dayanıb

Ordu kimi tək adam

Tək adam-ordu kimi.

Səkkiz milyon plyus birəm

Ayrı-ayrı zamanlarda yaşayırıq

haçandı bir-birimizlə

başqqa dildə danışırıq.

Yeri bilinməyən yerəm

gələcəkdən,ya keçmişdən gələn diləm.

Səkkiz milyon minus birəm

səkkilz milyon plyus birəm.

Adım da çıxıb yadından

heç olmasa nömrələ,

heç olmasa, heç olmasa

-Cənab 8.000.000 + 1 de!

Düz 10 ildi əynimdəsən

10 yaşın mübarək olsun.

Nə kökdəsən,nə gündəsən?-

görən görsün,bilən bilsin.

Qış,payız bürünəcəyim

Mən səni geydim, sən məni

bürünüb bir-birimizə

yol gedirik xəzəl günü.

İşdi, Allah eləməmiş

çoxlu-çoxlu pulum olsa,

gedib təzə plaş alsam

səni atmaq çətin olar

çətin olar,yaman çətin..

özüm özümü ələdim

ələdim,gəlmədim ələ.

yavaş-yavaş ağarırsan

Kəfənim sənsən elə

***

indi də mənimsən,yüz il sonra da

mən sənə çatınca Kül olacağam

sən mənə yetincə Gül olacaqsan

min il bundan əvvəl mənim olmusan

qoşmalar,qəzəllər yazmışam sənə

ayrılıqlar acığına

mənim olmusan ey...!

mənim olmusan.

batır başdaşım torpağa

adını çağıra-çağıra

o mənəm doğulan "Doğum evi"ndə

adını çığıra-çığıra

Yaşandıqca bəllənən

küllənən,güllənən

sondan geriyə oxunan KİTABDI

alın yazıları.

Hamar yolda tapar məni

Ömür qəzaları.

Əlini saxla,Ustad,

ana bətnindəki körpə alnina

çəkmə həyat şəklini,

Görmürsənmi halımı?

pusquda dayanıb ömür qəzaları

Mənim də alnımdan, çək əlini,

çək,Ustad,

Ömür qəzaları

ağ bayraqla göstərər YALANını