Abşeronda ağır qəza
Abşeron rayonunda özəl şirkətlərin birinə məxsus sərnişin avtobusu qəzaya uğrayıb.
Adalet.az "Report"a istinadən xəbər verir ki, hadisə Qobu qəsəbəsində baş verib. Şirkətə məxsus 10-VJ-993 dövlət qeydiyyat nişanlı "Mercedes" markalı sərnişin avtobusu hərəkət edən zaman onun qarşısına "Ford" markalı yük avtomobili çıxıb.
Nəqliyyat vasitələrinin toqquşması zamanı avtobusda olan 1975-ci il təvəllüdlü Raifə Gülverdi qızı Cahangirova, 1976-ci il təvəllüdlü Şölə Sabir qızı Hacıağayeva, 1978-ci il təvəllüdlü Səidə Əliyoldaş qızı Sadıqova və 1973-cü il təvəllüdlü Qəhrəman Ağami oğlu Abdıyev müxtəlif bədən xəsarətləri alıb.
Yaralılar xəstəxanaya yerləşdirilib. Həkimlərin verdiyi məlumata görə, Q.Abdiyevin vəziyyəti ağırdır.
Faktla bağlı Abşeron rayon Polis İdarəsində araşdırma aparılır.