Söz ağlayır,

elə bil,

Şairlərin dilində

Söz şairdən -

Şair sözdən,

İki aşiq

bir-birindən

ayrı düşəndə.

Sözün də elə bil,

Ürəyi var,

qardaş

Söz də elə bil

dil bilir,

qardaş

Sevinc gəlir

gözlərinə

Qəmli şairi görəndə

Yaş gəlir gözlərindən,

Gülən şairi görəndə

Ömrün boyu

heç bir yerdə,

rast gələ bilməzsən,

əziz oxucum

bu cür iki aşiqə -

canbir -

könülbir

ayrılmaz sevgiliyə.

Elə bil,

bənövşə kimi

bəndə düşüblər

bir-biriylə

Şair sözə aşiqdi -

Söz də şairə...

Vurulmuşam

əzəl gündən,

tanıdığım

və tanımadığım

İki əziz sevgiliyə -

necə də düşüblər bəndə.

***

Sevgi sözdən doğulur,

Söz də sevgidən.

Xəmirini bir yerdə

yoğurub əzəldən,

Bir olan Allah...

Söz ilə sevginin.

Ona görə də

qədimdən,

bir-birini

sevirlər

iki sevgili kimi

Söz sevgini -

Sevgi sözü.

Yalandırmı,

Bəs niyə

Düşmür dilindən

aşiqlərin

gecə-gündüz

Sevgi sözü -

Eşq kəlməsi.

Deyirlər,

qardaşım

Yağ yağ ilə qaynayar

Kaş ki,

sirdaşım

Belə sevəydi,

Bir-birini

əzəldən

bütün aşiqlər

aşikar olanacaq

Sözlərin düzü.

Sual-cavab dünyası

Suallarla doludur,

qoca dünya...

Hər sualın

bir cavabı var -

deyirlər əzəldən

Kaş ki,

bütün sualları

sanmayaydıq

tapmaca.

Düz sualın

düz də

cavabını tapaydıq,

Gücümüz çatınca -

yolumuz aydınlaşınca.

Özümüzə verdiyimiz

Suallardan

Özümüz yorulmayaydıq,

Sözümüz də yorulsa -

Yerimiz də yorulsa -

Göyümüz də yorulsa.

İş bitir

elə bil,

birdən sonuna

könlümüz yorulanda.

Özümüzə verəydik,

suallarımızı.

Həqiqət görəydik

xəyallarımızı.

Yağış yağa

bilərdimi?..

Bulud dolmasa

Sular durula

bilərdimi?..

Göylər dolub-boşalmasa.

Suallarımız

cavablana

bilərdimi?!

Yığın-yığın

cavabları olmasa.

Nə yaxşı ki, dünyamızda...

Ulduzlar

gecə yarı,

düzülüblər səmaya

qatar-qatar.

Hər ulduz

deyiblər,

bir nağıldı -

Ulu nənə-babalar

Eh...

Mənim də yadımda,

Nə qədər

sözlər qalır

Qoca nənəmdən yadigar.

Bir sözü yadıma

qarlı qışı salır,

bir sözü nurlu bahar...

Hər gecə

sonsuz ulduzlara

qalır, sanki

ötənlərdən yadigar -

Keçənlərdən yadigar.

Babam demiş,

ay bala,

dünyada

qan-qada var.

Nənəm demiş,

Sus-canım

Dünya bahardı -

bahar...

Mən də deyirəm,

nə yaxşı ki,

bu qoca dünyamızda

bir nənə -

bir baba var,

bir də bizə yadigar

yarı şirin -

yarı qəmli

gözəl-göyçək nağıllar.

SEVGİ AĞACININ KÖLGƏSİNDƏ

Ürəyimdə bir sözüm var,

ellər dinləsin.

Sözümə məna verən

dillər dinləsing

il anıram sözümü

sevən sevəcək,

kaş ki, bircə kəlməmi

mənalı bilib

təzəcə eşqə düşən

könlü təmiz,

sevgililər dinləsin.

Arzum budur,

bu dünyada

Sevənlər bir-birini

elə sevsin ki,

ürəyinin atəşində-

gözlərinin nurunda

qoca dünya dincəlsin.

İlk dəfə

eşqə düşən sevgililər,

hərəsi bir bağçada -

hərəsi bir bağda

ən çox sevdiyi

ağacdan

bir budaq əksin.

Sevgiləri böyüdükcə,

əkdikləri

ağaclar da

göyərsin.

Günlərin bir günündə,

O ağacların kölgəsində

Sevgililər dincəlsin.

Ancaq bütün

Sevgililər deyil,

ürəkdən sevən sevgililər

gəlib dincəlsin

Dünya adlı -

Sevgi adlı

bu ağacın kölgəsində.

SÖYLƏMƏ

Əzizim, həmişə qalsın yadında

Ürəkdən gəlməyən sözü söyləmə

Söz də qiymətlidi qoca dünyada,

Ocağı söndürüb közü meyləmə.

Sözün qiymətini bilənlər bilib,

Günlərin bir günü ərənlər bilib.

Mənanı gəlməni düzənlər bilib,

Boş yerə hər yerdə mahnı söyləmə.

Misal götür misalların içindən,

Mənanı sez mənaların içindən.

Dünya gəlir dünaların içindən,

Hər məclisdə durub ağı söyləmə.

Dədə Qorqud yadigarı elin var,

Nəsimidən qalan seçmə dilin var.

Füzulinin divanı tək şeirin var,

Əbəs yerə quru nağıl söyləmə.

Bu dünya bir ocaq oldu bizlərə,

Nuru doldu işıq olub gözlərə,

İnanma heç quru-yalan sözlərə,

Öz-özünü aldanışa səsləmə.