Səng

heç üşüdünmü

İsti yay günündə?

Alovu saçlarını qarsan soba dibində

Barmaqların soyuqdan

titrədimi?

Sahibsiz köpəklərlə bölüşdünmü

Əllərinin hərarətini?

Rühün süzüldümü

Nəhəng ticarət mərkəzlərinin

Basırıq dəhlizlərindən?

Reklam lövhələrində

Alın yazını oxudunmu heç,

Qızcığaz?g

Sən hardan bilirsən tənhalıq nədir?

Səng

Heç

Sevgiylə qətl edildinmi?

Ruhunu asdılarımı

Özgə istəklərinin

dar ağacından...

Gözlərini açdınmı

Alnından süzülən

Soyuq tər damlalarının

Titrəyişinə?

Yas tutdunmu heç

Sevdiklərinin gəlişinə?

Sevə-sevə zorladılarmı

İçindəki məsum sevdaları?...

Doğmalar arasında özgə oldunmu?

Kölgə oldunmu

Ruhunu zorla daşıyan

Soyuq bədəninə?

Milyonların arasında

Tək qalmayasan deyə

Ruhunu

Zərrələrə

böldünmü heç?

Öz içində

Gündə yüz yol doğuldunmu,

öldünmü heç,

Qızcığaz?

Sən hardan bilirsən tənhalıq nədir?...

***

İçindəki kimsəsizliyin

ən son nöqtəsinə çəkilməkdi...

Tənhalıq...

Ayrılığa,

Yalnızlığa,

Ölümə,

tərk edilmək deyil,

Sevgiyə tərk edilməkdi...

Tənhalıq...

Üşüyür yastığa sarılan qolların,

Qıvrılır qoynunda şaxta, boran, sazaq.

Rəsmini çəkirsən gözünə yolların...

Bütün rənglər qara,

Bütün yollar uzaq...

...Bir ömür kimsəsiz...

Doğmalar içində,

Doğmalar sevgini yağmalar içindən...

Bu sayaq sıxmalar, boğmalar içində

Bütün qəlblər məhbəs,

bütün eşqlər yasaq...

Ay ötdü, il keçdi...

Çiləmiz dolmadı,

Sən dedin: Ümid var,

Sən deyən olmadı...

Daha deyiləsi sözümüz qalmadı...

Qoy sükut danışsın -

Gəl sükutda susaq...

Üşüyür bu gecəm Ay işığında

Yürü, çək yükünü gündüzə sarı.

Baxışım açılmış yumaq kimidi

Di al, bir ucunu...

Ulduza sarı...

Alışdım yuvamda dərd böyütməyə,

Sonra dən-dən ovub...

dərd üyütməyə...

Bir ocaq çatmışam dərdi ütməyə,

Götür ürəyini gəl bizə sarı...

...Qarağac gölgəsində

Üşüyür dualar...

Üşüyür göz yaşları...

Sükuta keşik çəkir

Soyuq məzar daşları...

Bir ovuc torpaq...

Və

Soyuq bir salavat çırpılır üzümə...

Allahın mərhəməti kimi...

Başdaşları üzərində saralır fotolar...

Saralır...

Tanrının ədaləti kimi...

Sənə sarıldığım yerdə

Qırdığın qolu bağışla

Ver, ruhumu döyəcləsin,

Yağış ver,

Dolu bağışla...

Dərd çəkdim...

Bilən olmadı...

İz çəkdim...

gələn olmadı.

Tək sənin kölən olmadı...

Bu aciz qulu bağışla...

Bu yol sənə aparmasa,

Bu eşq -

İzini sarmasa

Ölüncə...

Sənə varmasa -

Getdiyim yolu bağışla...

Bir bilsən nə qədər yorğunam. Allah,

Alan yox bu yükü çiynimdən mənim...

Ruhum əzab çəkir bu dar bədəndə,

Soyundur bu ömrü əynimdən mənim...

***

Quruyub dodağım, quruyub dilim...

Qalmısam kimsəsiz, tək, ayaq üstə.

Daha zamanın da əyilib beli

Di götür...

Şəklini çək ayaq üstə.

Verdiyin ömrü də yormuşam, Allah,

Vaxtın qələmini qırmışam, Allah.

Sən qoyduğun küncdə durmuşam, Allah,

Əlləri havada, tək ayaq üstə.

Sən demə heç yoxmuş həsrətin sonu,

Sən elə tənhaydın, mən elə təkdim...

Nə çəkdin, nə çəkdim,

Bilirəm bunu -

Sən eşqi, mən eşqin şəklini çəkdim...

Sil mənim adımı,

Sil...

Yenidən sil...

Sevgi qatarının son biletindən.

Qəlbimdə ilməsiz bircə yer qalıb

Dur as gözümdəki portretindən...

Son sözüm nə oldu?

"Uzaqmı yollar?...

Bircə kəlmə... susma, burcə kəlmə yaz".

Dilimin ucunda iki fəsil var -

Bircə kəlmə payız, bircə kəlmə yaz...

Sənə nə göndərim,

Payız, yoxsa yaz?...

Mənimçün fərqi yox, elə xəzandı!

Daha içimdəki ocaq alışmaz,

Sən öz gözündəki çırağı yandır.

...Düşdün ayrılıqlar köçünə, yenə

Yol deyil qayıdıb gələ biləsən...

Dərd deyil çəkəsən içinə, yenə...

Yurd deyil...

Uğrunda ölə biləsən...

Qurtulub bu qul köçündən

Nəyin var alıb gedəsən.

Milyonlarla yol içindən

Yolunu bulub gedəsən.

İlhamın yorulan yerdən,

Bulanıb durulan yerdən,

Son dəfə qırılan yerdən

Qələmi yonub gedəsən.

Yol bitsə də dönməyəsən,

Dünya qopsun...

Dinməyəsən...

Təkcə...

Dizə enməyəsən...

Çatlayıb, sınıb gedəsən.

Tapdalayıb tabuları,

Bu qondarma yapıları...

Çırpıb bütün qapıları

Cəhənnəm olub gedəsən!

Qış nağılı

Getdin,

Ümidlərin yol ayrıcında

Nə qərib göründü bu şəhər sənsiz...

Üşüdü gecənin tənhalığında...

Qışa təslim oldu bu səhər, sənsiz...

Soyudu havalar...

ürəyim kimi,

Yollar buz bağladı baxışlarımda...

Titrəyən nəfəsim çəkdi rəsmini,

Çəkdi yağan qarın naxışlarında...

Dərdimin üstündə kirşə çəkən qız

Çəkmə, dərdlərimin buzu əriyib.

Sənin duz basdığın köhnə yaradı

Üstündə min ilin duzu əriyib...

Yenə aramıza səd düşüb, Allah,

Düşüb, toxum kimi...

Dərd düşüb, Allah...

İçimə elə bir od düşüb, Allah,

Alnıma yazdığın yazı əriyib...

Susduq göz yaşında xatirələrin,

İçində, dışında xatirələrin...

Gecdi...

Yaddaşımda xatirələrin

Ləpiri ovulub, izi əriyib.

Gəl, gülüm...

Yetimdi bu qapı sənsiz...

Ayaq səslərinə təşnə dəhlizim.

Bəlkə bir an öncə getmisən, amma

Mən yenə sənsizəm...

Yenə sənsizəm.

Mən yenə sənsizəm...

Bu sənsizliyin

əvvəli ayrılıq, sonu ayrılıq...

Bir sevda böyütdük göz yaşlarıyla -

Nəfəsi ayrılıq, qanı ayrılıq...

Azdıq bu sevdanın dolanbacında?

Sola hellənəndə

Sağa çıxmışiq.

Bir nəfəs çəkmişdik ah çıxarmağa

Demə...

çəkdiyimiz aha çıxmışıq...

Qoy olsun...

Sevgidən doğan bir ahsa

Təpədən dırnağa bu aha bataq.

Sevilmək gunahsa,

Sevmək günahsa

Gəl gülüm...

Birlikdə günaha bataq...

Qop yerindən...

Yürüyüb gəl

Yolum səni gözləyir.

Dəhlizdə göydən asılıb

Qolum, səni gözləyir.

Həsrətindən alovlanır

Yanır...

Yanır nəfəsim.

Sənsizliyin havasına

Havalanır nəfəsim.

...Qop yerindən

Qop...

Qapımın

Küləyini qucaqla...

Qapım ilə bir açılan

Ürəyimi qucaqla ...

Gecəmi al ağuşuna,

Səhərimi öp bir az.

Nisgilimlə qolboyun ol,

Kədərimi öp bir az...