Xüsusi qruplar var həm saytlarda, həm də sosial şəbəkələrdə çox fəaldırlar. Bu qruplar da kimlər tərəfindənsə həm maliyyələşir, həm də idarə olunur. Kimlər deyəndə təbii ki, mən, sən yox, əlində maliyyəsi və iqtidarı olanlar tərəfindən.

Məlum dəhşətli avtomobil qəzası. Hələ nəyin nə olduğu, kimin kim olduğu bilinmir. Saytlar və sosial şəbəkələr dağılır. Dərhal qəzanın bir ucu fövqəladə hallar naziri Kəmaləddin Heydərov tərəfə yönləndirilir. Guya «Mazda»nın sürücüsü nazirin qardaşı Səməd Heydərov olub. Böyük-böyük qruplar qılıncını çəkib K.Heydərovun üzərinə. Nələr-nələr yazırlar.

Hüquq-mühafizə orqanları qısa bir zamanda «Mazda»nın sürücüsünün kim olduğunu aydınlaşdırır. «Maqa» ləqəbli bir uşaq.

Dayanmaq yox, yola davam. İkinci bir taktika işə düşür. Həmin «Maqa» Fövqəladə Hallar Akademiyasını bitirib və Fövqəladə Hallar Nazirliyində çalışır. Filmdə deyildiyi kimi, yenə həmin dalğa, həmin koordinat, yenə həmin hücumlar.

Fövqəladə Hallar Nazirliyi rəsmi açıqlama yayır ki, həmin şəxs Akademiyaya müsahibədən keçməyib və Akademiyaya qəbul olunmayıb və heç vaxt FHN-in heç bir qurumlarında işləməyib. Xeyri yoxdu, nə DİN-in açıqlamasının, nə də FHN-nin açıqlamasının. Nəsə indi başqa bir şey atacaqlar ortaya.

Belə yalan şayiələri yayan ilk xəbər saytını və həmin saytla eyni dairədən olan saytları, eləcə də bunu ilk dəfə sosial şəbəkələrdə paylayanı və paylaşanları və o şərhləri yazan qrupları tapmaq elə də çətin deyil. Bunları tapandan sonra yönləndirənləri də tapmaq iki vur iki.