ZƏHRA HAQQI OYATDI
Məsum, körpə Zəhra balamız faciəli ölümü ilə sinəmizə dağ çəksə də, nəhayət erməni faşizminin xislətini açıb bir daha göstərdi, haqqı, ədaləti, susan vicdanları oyada bildi, lal olan dilləri açdı, dərdimizi, həm də məqsədimizi bəşəriyyətə anlatdı. O, Haqqa qovuşmaqla, haqqı silkələyib oyatdı.
Dünya ona sehrli,
Şirin yuxu nağıldı.
Ancaq bu sirli dünya
Bir andaca dağıldı.
Nakam, körpə ruhları
O, köməyə çağırdı
Haqq istədi Tanrıdan
Səsin səslərə qatdı,
Zəhra haqqı oyatdı!
Ölümü yuxu bilib
Uyudu fidan balam
Yatdı gözündə həsrət
Sinəsində qan balam.
Mələk sifətli körpəm,
Ölməz, qəhrəman balam
Güllələrə "sus!” deyib
Ədalətə can atdı,
Zəhra haqqı oyatdı!
Ona dəyən qəlpələr
Qəlbimizə köz salıb.
Balam mələk donunda
Şəhidliyə ucalıb.
Sanmasın yağı düşmən
Bu körpədən can alıb.
Ölən haqqa qovuşdu,
Öldürən qana batdı
Zəhra haqqı oyatdı!
Ölümüylə cəlladın
Xislətini açdı o.
Ədalətsiz dünyadan
Baş götürüb qaçdı o.
Həqiqətin yoluna
Günəş kimi saçdı o.
Gözlərində nur, ümid
Sakit uyudu, yatdı
Zəhra haqqı oyatdı!
Allah dözməz bu dərdə.
Haqqa şərik olacaq.
Vətən azğın düşməndən
Qisasını alacaq.
Bizə körpə balamdan
Bir xatirə qalacaq
O da düşmənə nifrət,
Gələcək, xoş həyatdı
Zəhra haqqı oyatdı!
Çəməndə oyuncağı
Gəlinciyi əlində
Köynəyində muncuğu
Qırmızı bant telində.
O, Haqq ilə danışdı
Bir anlıq öz dilində
Bu məsum qızcığazın
Səsi Tanrıya çatdı
Zəhra haqqı oyatdı.
Dünya duysun səsimi,
Məni dinləsin bəşər!
Ölümə məhkum olsun
Qoy xəyanət, fitnə-şər.
Yoxsa bu qətllərdən
Hər bir kəsə pay düşər.
Bu acı həqiqəti
Körpə Zəhra da daddı,
Ancaq o haqq səsiylə
Böyük haqqı oyatdı.
Tahir RZA
Millət vəkili