Azərbaycan vətəndaşları istirahət üçün ən çox Quba, İsmayıllı, Qəbələ və Qusara üz tutur. Axar.az-ın sualına cavab verən turizm şirkətləri ölkəmizin ən ucuz otellərinin Lerik, Quba, Qəbələ və Gəncədə yerləşdiyini açıqlayıb. "VİP Travel” şirkətindən vətəndaşların istirahət üçün daha çox şimal-qərb zonasına getdiyini bildirilib: "Cənub zonasında yollarda müəyyən problemlər olduğundan ora gedənlər az olur. Qiymət baxımından Qəbələ nisbətən baha olsa da, burada vətəndaşlar lüks otellərdə – "Qəbələ Sport”, "Qəbələ Resort”, "Yeddi Gözəl” və s. istirahət edə bilər. Quba-Qusar zonasında qiymətlər normal, hətta ucuzdur”.

Şirkət rəsmisinin sözlərinə görə, xarici ölkələrdən, xüsusən də Yaxın Şərq ölkələrindən olan turistlər daha çox Qəbələyə gedirlər. "Happy Travel” şirkətinin əməkdaşı da ucuz otellərə Qubada rast gəlməyin mümkün olduğunu deyir: "Quba və Qusar bölgələrində adambaşına 15 manatdan başlayan qiymətlərlə ucuz otellərdə istirahət etmək mümkündür. Naxçıvanda da ucuz istirahət mərkəzləri var, orada daha çox tibbi turizm inkişaf edib. Sezona görə uyğun qiymətlər və kampaniyalar tapmaq mümkündür.

Qiymətlər bir nəfər üçün günlük 15-40 manat arasındadır”.

"Omega Travel” şirkətindən də vətəndaşların ən ucuz Quba, Qusar, Qəbələ və Lerik bölgələrində istirahət edə biləcəyi vurğulandı: "Qubada və Qusarda bir nəfər üçün nəzərdə tutulan otel otağı qiymətləri 20, Qəbələ və Lerikdə 25 manatdan başlayır”.

"Meridian Travel” şirkəti isə vətəndaşlara həftəsonları üçün nəzərdə tutulan ucuz qiymətə müxtəlif turlar təklif edir:

"Komfortlu avtobusla, bələdçi, fotosessiya, sular, səhər yeməyi daxil olmaqla, vətəndaşlar müxtəlif bölgələrimizdə səhər saatlarından Bakıdan çıxaraq gecə yenidən paytaxta qayıtmaq şərti ilə istədiyi kimi əylənə bilər. Qəbələ və Quba üçün günlük turlar 20, Quba üçün 19 manatdan başlayır”.