Mayın 24-də "Boulvard Hotel”də Birinci Bakı Şopinq Festivalın yekunlarına həsr olunmuş mükafatlandırma mərasimi keçirildi.

Tədbirdə çıxış edən Azərbaycan Respublikasının mədəniyyət və turizm naziri Əbülfəs Qarayev ilk festivalın uğurla başa çatdığını bildirdi. Qeyd etdi ki, təkcə ölkəmizdə deyil, regionda ilk dəfə olaraq keçirilən bu festival Azərbaycan Respublikası Prezidentinin müvafiq sərəncamı ilə təsdiq olunmuş turizmin inkişafına dair Strateji Yol Xəritəsinə uyğun olaraq təşkil edildi.

İlk festivalın böyük əks-səda doğurduğunu bildirən nazir qeyd etdi ki, növbəti şopinq festivalının vaxtı və proqramı yaxın günərdə elan ediləcək. İlin sonuna yaxın keçirilməsi planlaşdırılan ikinci festivala 500-dən çox mağazanın qoşulması və "Tax Free” sisteminin müddətinin uzadılması nəzərdə tutulur.

Tədbirdə nazir Əbülfəs Qarayev Birinci Bakı Şopinq Festivalının təşkilatçılara nazirliyin mükafatlarını təqdim etdi. Festivalın yüksək səvyyədə təşkilinə görə, Azərbaycan Konqreslər Bürosunun direktoru Ülviyyə Mirqasımova "Fəxri turizm işçisi” döş nişanı ilə təltif edildi.

Bundan başqa, Birinci Bakı Şopinq Festivalının təşkilindəki fəallıqlarına görə, Büronun əməkdaşlarından Söhrab Fərhadov, Fəridə Axundova, Nigar Nəzərova, Firuzə Mirzəyeva, Fərizə Qasımzadə, Sevda Ömərova, Dinara Yusufova və Aytəkin Quliyeva isə Mədəniyyət və Turizm Nazirliyinin Fəxri Fərmanına layiq görüldülər.

Tədbirdən sonra Azərbaycan Konqreslər Bürosunun direktoru Ülviyyə Miqrasımova festivalın rəsmi saytına (www.bakushopfest.com) açıqlama verərək nazirlik tərəfindən "Fəxri turizm işçisi” adına layiq görülməsini və büronun bir qrup əməkdaşının nazirliyin fəxri fərmanı ilə təltif edilməsini rəhbərlik etdiyi kollektivin işinə verilən yüksək qiymət olduğunu bildirdi. Ü.Mirqasımova göstərilən etimada görə Mədəniyyət və Turizm Nazirliyi rəhbərliyinə və şəxsən nazir Əbülfəs Qarayevə minnətdarlığını bildirdi.

Hər il təşkil ediləcək Bakı Şopinq Festivalı ilk dəfə bu il aprelin 10-dan mayın 10-dək Azərbaycan paytaxtında keçirilib. Növbəti festivalın keçirilməsi bu ilin sonuna nəzərdə tutulub. Azərbaycan Respublikasının Prezidenti İlham Əliyevin 1 sentyabr 2016-cı il tarixli sərəncamı ilə təsdiq edilmiş, "Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi”nə əsasən, hər il keçiriləcək şopinq festivallarının təşkili Azərbaycan Respublikası Mədəniyyət və Turizm Nazirliyinin nəzdində Konqreslər Bürosuna həvalə edilib.

Aşağıdakı telefon nömrəsi və elektron poçt vasitəsilə, BSF haqqında ətraflı informasiya almaq və təşkilatçılarla əlaqə saxlamaq olar:

Telefon:0124982063

Media müraciətlər üçün:http://bakushopfest.com/for-media-inquiries/