Soldu içimdəki yaz,

Payızamı tutuldum?

Bir yaddaş toranında

Nə yaxşı unuduldum.

İndi elə arxayın,

Elə boşalmışam ki.

Hökmdar qəzəbimdən

Elə boşanmışam ki.

Uçan bulud dalınca

Yelləyirəm yaylığı.

Yaşayıram xəlvəti

Bir ümid subaylığı.

Yüngülləşən yükümdən

Ovcuma daman nədi?

Bu dağ səbrimdən qopan

Görən o duman nədi?

...Soldu içimdəki yaz,

Payızamı tutuldum?

Bir yaddaş toranında

Nə yaxşı unuduldum.

Heç olmasa...

Akvariumda balıqlar...

Tənbəl balıqlar.

Həbs olunmuş

Suyun dərdi

Bilməz balıqlara

həyat versin.

Yoxsa baş

girləsin balıqlar.

Muzey taleyində,

Dəniz arzusunda

Gözünü döyər balıqlar,

Deyər balıqlar -

heç olmasa

mənə uşaqları verin,

Darıxmayım, darıxmayım.

Hələ bilmir ki

Səsimi çəkmişəm içimə...

Ağrı qarışıq

Söndürmüşəm siqareti...

Uşaq yuxusunda

pəncərə, qapı

udduğum hava,

içimdəki dava.

Ürəyimin çapı...

Ağrılar

ayılar, oyanar

birdən,

Ayılar oyadar

birdən

qonşu otaqdakı yuxunu, beşiyi.

Ağrılar nəfəs

dərmədən keşikçidi -

bu südəmər,

bu körpə yuxuya.

Hələ bu körpə

bilmir, bilmir ki,

ağrıyla oyanan

yuxular var

dünyanın hər yerində.

Əllərdən tuta-tuta

Doğma əlin istisi...

Sinəm də atəş-atəş.

Ovcumdadı nəbizin

Məni axtaran günəş.

Darıxmağa macal yox,

Qanımda qaynayır qan.

Dərd nəfəs yeri tapmır

Təbəssüm sıxlığından.

Ömür uzansın belə,

Vaxt daralmış sükuta.

Əridək soyuqluğu

Əllərdən tuta-tuta.

Nəfəs-nəfəsə bulud...

Bulud damır çiynimə,

Yel aparmış saçıma.

Göylərdən asılmışam,

Bu günümə acıma.

Bu yağış udur, udur

Quraqlığın dadını.

Bənövşə kölgəsində

Xatırladım adını.

Bulud əlli, dəlisov.

İslanmır ki xəyalım.

Burda da çarpayım yox,

Səninlə qoşa qalım.

Damcı-damcını qovur,

Hara uçubdu kölgən?

Nəfəs-nəfəsə bulud...

Fikrimi çətir kimi

Yağışa tutmuşam mən...

Sular durulmur...

Bu çay ki belə axır,

Sular durularmı heç?

Göz-gözə dikilməsə,

Könül qurularmı heç?

Ev bizim olardımı,

Sirləri əyan olsa?

Dəliyə yel verərdi

Bir özgə əyyam olsa.

Axı iş-güc vaxtıdı,

Necə durum bekara?

Fikri dustaq qoyanda

Neyləsin bu biçarə?

Çox cəhdim boş çıxıb,

Yırtmışam ki çarığımı.

Amma küskün deyiləm,

Dünyanın gücü mənəm,

Fırlayıram çarxımı.

Sular durulur gedir,

Könül qurulur gedir,

Kimsə yorulur gedir....

Hamı susur hələ ki...

Bu kölgə o kölgədə,

Bu dalan o dalanda.

Yol vermir ki, yol yola

Bu yalan o yalanda.

Bu tikə o tikəni

Vurub əlindən alır.

Yuxulayan xəyalı

Durub əlindən alır.

Bu şəhər o şəhərin

Bazarlığı, çantası.

O it də Aya hürür

Yedəklərdə xaltası.

Bu can o can içində,

Nəfəs dərir, ilahi.

Quldura qul kölgəsi

Nəfəs sərir, ilahi.

Təknəmə aclıq atan

Bu dən o dəndən qaçır.

Avandı tərsə düşən

Bu qəm o qəmdən qaçır.

Bu arxın suyu axmaz,

Dəhnəsində bulud yox.

O can daha yorulub,

Dincəlməyə sükut yox.

Hamı incik dünyada,

Hamı küsür hələ ki.

Öz-özünə qaramat

Hamı susur hələ ki...

Həyan dərdlər

Yuxumu gəl belə yozma yüz yerə,

Sinəm yovşanlıqda... quruca çölmüş.

Əlimdə, ovcumda diri ümid yox,

Neyləsin bu tifil - anası ölmüş.

Bu bəxt dediyin də yanlış yazıdı,

Bircə nağılı da gülmədi üzə.

Gördüm məndən xəlvət...

Dərd yuva qurmuş,

Atımı dördnala çapdığım sözə.

Xəyalım... qanadı o sınıq-sınıq,

Nə dağ aşa bilir, nə enir çaya.

Gözündən buludu sökülən göy də

Kiridir buludu çatmır haraya.

Qovrula-qovrula darıxır canım

Tüstüsüz, bacasız ocağam indi.

Dünya da fikrini tökür üstümə,

Demirəm dərdindən qaçağam indi.

İndi uçan evəm, quruyan ağac...

Sinəm də ağrılar böldüyü qitə.

Haraya yüyürüm, haraya çatım,

Səmtsiz ağrılar düşsün səmtə.

Baxıb göy üzünə fikir çəkirəm,

Yollar da yolumu çəkir sabaha.

Elə fağırlaşıb könlümün qəmi,

Dərdlərim özünə həyandı daha.

Dincəl, günah yiyəsi

Üzülmə can yiyəsi,

Candan söz üzüləndə.

Mərcan günlərin gülü

Son günə düzüləndə.

Yerin, göyün əlindən

Səni alan kimdi ki?

Göz yaşında nişan var

Bu qəmlər bizimdi ki!

Eh, ayrılıq nağılı

Uzun imiş sən demə.

Olacağa çarə yox,

Bu yoxluğa qəm yemə.

Yerin ki arxayındı,

Ah çəkmə, ah yiyəsi.

Yat, yuxun şirin olsun,

Dincəl günah yiyəsi.

Dən işığı, qəm işığı

Gecə kimi kor gündüzüm,

Bir fikrim də ağla batmır.

Kimdi, axı, aramızda,

Əl uzatsam əlim çatmır.

Acı dillər, qara yellər,

Nə gəlsə insana gəlir.

Yorğunluqdan bezən canım,

Yorğunluqda cana gəlir.

Yenə bəxtin oyununda,

Tale əli tutub üzük.

Gün var ömür ağrısına

Dözümü yox bir ömürlük.

Eşələyir qarışqa da

Yuvasına dən işığı.

Bizi qoymaz qaranlıqda

Nə yaxşı ki, qəm işığı.

Can sağlığı

Yenə söz-söz oyaqdı

Sığanmış göz qapağı.

Ruhun əlləri açır

Düymələnmiş torpağı.

Darıxmaq fürsətində

Çoxdu hələ bəhanə.

Qəmlər qəm dəryasında,

Təbəssümlər şahanə.

İndi getmir ayaqlar,

İndi qollar qanaddı.

Vaxta da sinə döyən,

Kiriməyən saatdı.

Dirilmək ki, diriltmək...

Şeir, çiçək işidi.

Hər günün can sağlığı

Yaddaşın keçmişidi.